Ətomiyə sazişədə İroni hərəkəton milləti zumandə himoyəon bois be; ətomiyə sazişədə İron İslam Respublika vey səbrış karde.

İroni millət zinə cumə nımoji bəpeştə ətomiyə sazışi çərçivədə İroni dıvləti tojə ğərolonku himoyədorəti kardəşone.

Bə İrib raporti əsos İroni millət ım aksiyadə bə Amerkə və sionist rejimi əleyh şuar doe kənoədə Amerkə və Avropa ğeyri ğanuni hərəkəton vədə bə zumandə hərəkəton əncom doe zəroriyat təkidışon karde.

Im aksiya oxoyədə İroni millət de ğətnomə vasitə bə Amerkə rəsmi şəxson notaşon doe ki İroni təhdid ya təhrik karde vədə ciddi reaksiyaon bə vinden.

İroni nımoj oton iyən ruj əqəton bə xarıci kişvəron xatircəm nı bey iyən çəvon ziyod tələbion rəd karde təkid kardışone iyən İroni dıvlətiku pidəşon be ki çı Avropa və Amerkə be ğanunə hərəkəton dəvom karde vədə ciddi hərəkəton əncom bıdən.

İjən zinə İroni xarıci vəziri siyasi muavin Seyed Əbbas İrağçi de İnqiltərə xarıci vəzarətxonə siyasi mudir Riçard Mor vindemon karde bə ətomiyə sazişədə İroni səbri təmom bey işorəş ka və votışe: Avropa bəpe İroni tojə ğərolon vədə ciddi bıbu boçi ki İron ıştə ehdemonon qədə qədə kam karde məğsədış heste.

İrağçi bə ətomiyə sazişədə mande kişvəron ehdemonon icra bey zəroriyati xusosi bank iyən nat sahədə detos ome 60 ruji təkidış karde.

Riçard Mor həm ijən təkidış karde ki İnqiltərə de İron məxsusə maliyə mexanizmi icod kardero bəştə səy-cəhdon idomə bədoy.