Ərbəyin, Aşurə kəmol

Ərbəyin,qıləy ğafilə iyən kərvoni saxt iyən məşəğğətə 40 ruj bədiqə bə Kərbəlo oqardeye.qıləy ğafilə ki,bəbe çı darşiye astanə pik həddədə bıbu.

Əmmo ısət səbarz iyən ğalib oqardedən.çı məğlubiyyəti  zəhrışon bə Bəni-Uməyyə kam ekardəşone.çəvon ğəsbkorə ğudrətışon tənğıd kardə iyən çəvon duyə pardəonışon bə kəno jıə ta bə həyğəton təmşo kardey mumkin bıbu. Ərbəyin çı zılmo-sıtəmi rısvoyəti iyən çı həxı səbarzətiye.

Aşurə ruji ğurubi vaxti bə İmom Huseyn(ə)-i əshobi xeyməon otəş jıey bəpeştə, hırdənon biyobononədə sərqərdon mandin.çandə ləzə bədiqə,Kərbəloyədə çı deşmıni ğələbə şoyvonətiyon bino be.deşmıni ləşkər de ğəh-ğəhə sıredəbin iyən raxs kardedəbin.çoko ki,şəv be,əvon şedəbin ıştə xeymənonədə hıtedəbin iyən de istirohəti məşğul bedəbin.əmmo bın tərəfədə jenon iyən hırdənon çı otəş jıə bıə iyən sutunə bıə xeyməon kəno,sıbhışon karde.Aşurə maşki səbarzəti xəbə bə Kufə rəse və Kufə bo şoyvonəti hozzı be.bə asbi suvar bıə şəxson de sırə diyənəti votedəbin ki,əmə canqi səhnəku ğalib oqardimon və bəmə mıjdəvoni bıdənən.

Əsiron ya vey çok bıvotəmon peyğombəri(s) əhli-beyt(ə) de qıləy vey bevəcə formə bə Kufə varid kardeşone.qıləy holədə ki,çəvon oləton poə bıəbe və tanədə çokə libosışon nıbe.əvonışon bə nomınosibə şaturon suvar kardəşon be.çı Kərbəloku bə Kufə 70-80 kilometr fosiləku de ziyodə əzob-əziyyəti oməbin rəsəbin.bəvon taziyonə iyən ğırmənc jıəşonbe və veyə məşəğğəti məruz mandəbin.çı Kərbəlo şəhidon səon nizə sədə iyən əsiron miyono novnedəbin ta çəvon dılon  tiki həm  ziyod  vəş bıqəto bısuto.qıləy əzob ki,de taziyonə,işkəncə iyən renci bə ico be.

Kufə bo səbarzəti idi bərpo kardero hozzı bedəbe ki,ğəflətən de həzrəte Zeynəb(s) əzəmətinə xutbə vositə,çı Bəni-Uməyyə Kufədə bıə cəh-cəlol iyən ğudrət darıştey be.ğərol nıbe ikəs bə həzrəte Zeynəb(ə)-i sıxan kardey fırsəti bıdo.əmmo əy xutbəş hande və jıqo de ciqəmandəti sıxan kardedəbe ki,hiç kəs ıştədə curət pəydu kardey nızneşe ki,çəy sıxanon bıbırno.ə həzrət jıqo de əzəməti xutbə handedəbe ki,nəfəson sinəonədə həbs bıəbe.Kufədə bıə id iyən şoyvonəti mərosim nimədə mande iyən və usəraşon rəyrə bə Şami tərəf vığandeşone.

Bə Şami varid bıey vəzyət bə Kufə daxil bıeysə komilə surətədə fərğ kardedəbe.ehanə Kufədə ruji Əmirəlmuminin hukumət kardedəbu,əmmo Şam çandə soron çı Muaviyə hukuməti jiyədə be və əvon de əhli-beyt(ə)-i oşno nıbin.Şamədə Əməviyon  çandə soron bə Əli(ə)-i ələyh təbliğat bardedəbin və həyğət iyən rəvoyəton təhrif bıəbe.Muaviyə ıştənış”Xalul-muminin” elonış  .çoko ki,usəra bə Dəməşğ varid bıey piyedəşonbe və deməkə ki,həzrəte Zeynəb(s) iyən İmom Səccod(ə) vey dılışon hestebe əvoni çı veyə camaati bıə vırəku nıdəvordınon,əmmo deşmınon ijən əvonışon çı şəhəri ğalə vırəku dəvordıneşone.hətto çı şəhidon səonışon həm çı əsiron miyono ğərol doşone ki,bıdə insonon dığğəti vey cəlbkon.

Yəzid ki,çı şəhri kəno boştə qıləy istirohətqoş soxtəbe iyən əyo de eyşo-işrəti məşğul be,hejo çəy qıləy barzə vırəku çı Kərbəlo əsiron bə Şami daxil bıey seyr kardedəbe.əv çoko ki,şəhidon mıborəkə səonış çı diyərku vindeşe,binoş karde bo şeer vote.

Qıləy kırtə zəmonədə macəra əvəz be.Yəzid məstə formədə de məğrurəti ıştə dastə bıə çu bə İmom Huseyn(ə)-i bırniyə bıə mıborəkə sə jedəbe və de məsxərəamizə formə bə həzrəte Zeynəb(s)-i voteşe:ıştə bo əcəb sipiyə dandonış bıə.bə ikkərə həzrəte Zeynəb(s) qıləy xutbəş bino karde və çı Yezidi muadiləonış bəyənde je.çın xutbə bəpeştə ziyodə etırozon bino be.qıləy nəsrani iyən xristiyanə şəxs məclisədə əyşte bə səpo və de təəccıbi voteşe:şımə bəştə peyğombəri fərzəndi kıştey xoto,şoyvonəti kardedon? çəmə sərzəminədə çı dıyo miyono qıləy cəzirə heste ki,əyo qıləy dıjdə kilsə heste və çəmə millət hiçnıbu sorisə ikərə əyo bə ziyorət omeydən.çı kilsə mehrobiku çı telıku qıləy zərf iyən ğab ehaştə bıə ki,bəvədə qıləy nanqır movcude.çəmə camaati etığodış heste ki,ım nanqır çı həzrəte İsa-Məsih(ə)-i penıştə ulağ iyən hə lınqi nanqıre.çən,bə həzrəte İsa(ə)-i ehtıromi xoto,millət əy ziyorət kardedən.əmmo şımə çı peyğombəri bəfoti bəpeştə bilofosilə çəy fərzəndon kıştəyone?.

Im etıroz bo Yəzidi vey boho bəsə ome.əve əmrış karde ki,ə həmonə merdi bıkışton.ısənə co qıləy merd ki,Romə imperatorətiku oməbe,de ğeyzinə formə bə Yəzidi etıroz kardeşe.yəzidi çəy ğətli əmrış həm bekarde.

Ənıvışt: Muhəmməd Bağıri