İroni xarıci vəziri muavin votışe: bə İroni ətomiyə təvafoği bərnomə ijən diyə karde ğanuni ni.

İroni xarıci vəziri muavin votışe: ətomiyə təvafoğ fəğət İron və Amerika miyono qıləy təvafoğ ni ki i tərəf çəy barədə ğərolış bıbu.

İroni xarıci vəziri muavin, Murtəza Sərmədi Yanvari 13-ədə tehronədə ijən  jurnaliston miyono çı Amerika tojə vıjniyə bıə prezidenti tərəfiku təklif doə bıə xarıci vəzir, Reks Tilersoni sıxanon barədə təkid kardə: ım ki vote bedə de Amerika omə devləti ome həmzəman bəpe İron və 5+1 qrupi miyono imzo bıə təvafoğədə ujnən təğib və diyə karde bıbu, beynəlxalğ sahədə ğanuni ni.

Sərmədi əlovəş kardə: ətomiyə təvafoğ, İron və 6 kişvəri miyono qıləy imzo bıə muğaviləy ki Avropa İbemon ijən İ Bıə Milləton Təşkilat həm əy təsdiğ kardəşone, çən lozime ki Amerika rəsmiyon ya xud co şəxsiyəton oğo bıbun ki bəy ujnən təğib və diyə karde hiç foydəş ni.

İroni xarıci vəziri muavin xatırcəmətiş kardə ki, Amerikədə omə devləton həm bəpe de həğiğət bə ivırə bıbun ijən cəhd bıkən ta ım təvafoğ vey çok və rə əncom bıbu.

Çı İroni xarıci vəzorətxonə Amerika və Avropa hissə muavin, Məcid Təxtrəvançi həm təkid kardə: İron İslam Respublika hiç faxt ətomiyə təvafoğədə ujnən təğib və diyə karde məsələ ğəbul əkə ni ijən ım nə ınki İroni fik, bəlkəm çı 5+1 qrupi vindemon heste.

2016-nə sori Yanvariku ijən İron və 5+1qrupi miyono ətomiyə təvafoği bəpeştə, Amerika kişvər bənə çın qrupi qıləy uzvon, həmmişə bə təvafoği zidd hərəkətış kardə.

Amerika konqresədə bə İroni zid ujnən 10 sori mıddətədə bıə sanksiyaon bo omə 10 soriro dəvom  doe, əcumlə çı Amerika həminə bevəcə hərəkətonin.