Əmir Əbdullahiyan: sionist rejim məntəğədə terror iyən xərobkaranə hərəkəton amile.
İroni xarıci vəzir de İ Bıə Ərəb Əmirəti xarıci koon vəziri telefoniyə votımonədə votışe: məntəğədə sionist rejimi iştirok, be stabiləti, noəmni və terror əmili icodəkəy.
Bə İrna raporti əsos, tojədən İroni xarıci vəzir, Əmir Əbdullahiyan de İ Bıə Ərəb Əmirəti xarıci koon vəzir, Şeyx Əbdullah Bin Zahid telefoniyə votımonədə, 2 tərəfi, məntəğə və beynəl xalğ məsələon barədə sıhbət kardışe.
Əmir Əbdullahiyan işorəş karde ki İron İslam Respublika xarıci siyasətədə, bə hamsuyə kişvəron vey təkid bıə.
Əv votışe: kişvəron miyono rabitə, bə inkişof rəse və əloğəon hevujəti bois bəbe.
Əmir Əbdullahiyan əlovəş do: İron İslam Respublika pidəşe, hamsuyə və məntəğəro əmniyyət iyən bə inkişof rəsey şəroyet icod bıbu, və məntəğə əmniyyətiro, xarıcion iştiroki təhdidəkə amil zıneydə.
İ Bıə Ərəb Əmirəti xarıci koon vəzir, Şeyx Əbdullah Bin Zahid həm həminə telefoniyə votımonədə bə 2 qılə kişvəri mıştərikə mənafe bə inkişof rəsey işorəş karde iyən İron və İ Bıə Ərəb Əmirəti rəsmi şəxson muzakirəonış pidə.
Şeyx Əbdullah Bin Zahid ijən votışe: İ Bıə Ərəb Əmirəti bə hiç tərəf icozə dodə ni ki bə İ Bıə Ərəb Əmirəti kişvəri zidd təhdid və xərobəkə hərəkəton əncom bıdə, və bəştə hamsuyə kişvəron əmniyəti həm diğğət kardedə.
