Kəşfiyot vəzorətxonə xəbəş do: İroni Şimol ğərbədə, qıləy terroristiyə şəbəkə uzvon dastğir bıən.

İroni kəşfiyot vəzarətxonə, İroni şimol ğərbədə, qıləy terroristiyə şəbəkə uzvonku i nəfəri dastiqir beyku xəbəş do, ım uzv bə təcziyətələbə şərrə dastəon vabəstə bıə terrorist be.

Bə İrna raporti əsos, İroni Şimol ğərb, Ğərbi Azərbaycan ostani ədliyə iyən Həmzə Seyyedulşohəda baza həmkari və himoyədorəti ijən de əmniyyəti məmuron huşinti vositə, qıləy terroristiyə şəbəkə həmmə uzvon dastqir bıən, ım uzv bə Təcziyətələbə şərrə dastəon vabəstə bıə terroristiyə şəbəkə məxsuse.

Bə həminə raporti əsos, ım 10 nəfərə terroristiyə şəbəkə həmohənqə qrupi ğolibədə, muxtəlif və çan curə xərobəkə məmuriyəton əncom doşone. tepemoni, bə İroni iğtisodi və muhimmə təsisaton və mərkəzon həmlə kardey, caddəon dəbastey və millətiku xususi bumi muvəffəğə ko ofəynə kəsonku, de şantaji pul sed ya ğəsb kardey əcumlə həminə məmuriyəton be.

Im şəbəkə uzvon ki İraği Kırdıstoni məntəğədə, Terrorizm ğolduron sakin bey himoyədorəti vositə, Ğərbi Azərbaycan mərzi məntəğə royku bə İron varid bey holədə be, dəvardə rujonədə, de əmniyyəti hərbion huşinə əməliyoti prossesi dim bə dim bıə və ğərəz ım ki ım şəbəkə har 10 nəfər uzvon dastqir bıən, çəvon həmmə canqi texniki, kammunikasiyə əbzaron əcumlə fərdi silohon, qrantaniyot, bombə, TNT və həmmə hərbi sursaton həm zəbt bıə.

İroni kəşfiyot vəzarətxonə, İroni Şimol ğərb, Ğərbi Azərbaycan ostani ədliyə iyən Həmzə Seyyedulşohəda baza həmkari və himoyədorətiku ğədrdonətiş karde iyən elanış karde: İroni milləti əmniyyəti oqətey, sıə xətte, və çımiku bənav, co kərə bə İraği Kırdıstoni məntəğə rəsmi şəxson nota doəmone be iyən tojədən nota bədomon ki ım məntəğəku həmmə terroriston, milləti əmniyyət və oroməti deşmənon iyən şərrə dastəon xarıc kon.