Ğalibaf: İroni İslamiyə İnğilobi səbarzəti rəmz, Şiə və sınnion miyono vəhdəte.
İroni İslamiyə şura məclisi yol, muxtəlifə baxşonədə kişvəri səbarzəti sirrış, şiə və sınnion miyono vəhdət bə hisobış varde iyən təkidış ka: muğəddəsə mudafiə iyən daxıli hodisəonədə, həm şiə və həm sınni əholi de vəhdət iyən fədokorəti vositə, İroni bə vey zumand vırə rosnişone.
Imruj Hicri Ğəməri 1444 minnə sori Rəbiuləvvələ manqi 12 minnə ruj, de Miladi 2022 minnə sori Oktiyabrə manqi 9 minnə ruj bə qıləy rəvoyəti əsos, İslami qıromiyə peyğəmbər Həzrəte Muhəmməd Mustəfa(s)-i milad ruji sorəqardış, iyən vəhdət haftə bino bey ruji bərobəre.
Sınnion nəzəku, Rəbiuləvvələ manqi 12 minnə ruj və şiəyon nəzəku ım manqi 17 minnə ruj, İslami qıromiyə peyğəmbər(s)-i milad ruji sorəqardış zıneydən.
İron İslam Respublika Yolə Təsisəkə, Həzrəte İmom Xomeyni(r) ki ıştə islam dınyoədə vəhdəti vanq kardə bıə kəson be, ım məsələku vəhdət və islami qrupon nez beyro istifodəş kardə və ım 2 qılə torixi miyono (Rəbiuləvvələ manqi 12 tosə 17 minnə ruj) vəhdət haftə nom noəş be.
Bə İrna raporti əsos, ımruj və parlamenti iclosədə, İroni İslamiyə şura məclisi rəis, Muhəmməd Bağır Ğalibaf Xıdo Rəsul(s)-i milad ruji bə həmmə dınyo mısılmonon təbrik votışe iyən vəhdət haftə bino bey qıromi zıneydə.
İslamiyə şura parlamenti rəis ijən əlovəş karde: vəhdət haftə, əzizə İron və islamiyə inğilobi xıdmət rosniye royədə, şiə iyən sınnion hamdelətiku qıləy simvol bə hisob omeydə.
Ğalibaf ijən votışe: muğəddəsə mudafiə iyən daxıli hodisəonədə həmişə ım vəhdəti şoyid bimon, həmonə vırə ki bə iştirok, fidokorəti iyən şəhid təğdim kardey ehtiyoc be, şiə iyən sınnion karde zınəşone de yande kənoədə, əzizə İroni zumand kon.
İslamiyə şura parlamenti rəis ijən təkidış karde: İroni İslamiyə İnğilobi səbarzəti rəmz, Şiə və sınnion miyono vəhdəte.
