EKO təşkilat bəzne şərğ və ğərbi miyono həmkarion kilid və vasitə bıbu.

İroni prezident votışe: Asiyadə tojə zuhur kardə iğtisadon çı beynəl xalğiyə iğtisodi cərəyani ğərbiku bə şərği tərəf hərəkət dodən və ım mıvzo 21 minə əsri bənə Asiya kişvəron bə na hərəkət əkə dıvrə əvəz bəkay.

İroni prezident Doktor Həsən Ruhani ımruj Pakistonədə EKO iğtisodiyə həmkari təşkilati 13 minə iclosədə təsdiğış kardə: dınyo iğtisodi dıl çın ğərni niməku bəpeştə Asiyadə tepnedə ijən iğtisodiyə nəticə və estatıstikaon nışo doydə ki EKO təşkilat omə soronədə çandə məntəğədə əhəmmiyət peydo bəkay.

Ruhani təsdiğış kardə dınyo çandə dıyonədə əhotə, dınyo enerji ehtiyaton soiyb bey və co stratejikə emtiyazon bo EKO təşkilatiro çandə fırsət və ğabeliyəton bə vıcudış vardə boçi ki Avropaku bə Asiya ticarət karde xoto EKO nomo bıə təşkilatədə uzv bıə kişvəronku bə kəno hiç qılə ro və vırəon kırt, iğtisodi iyən erjin ni.

Əv həmçınin votışe: İrin bənə qıləy uzv bıə kişvər ki ım təşkilati bino əkəyonku heste ijən de EKO təşkilati 6 qılə kişvəron mıştərikə sərhədış heste və dınyoədə çandə qaz və nati ehtiyaton xıvande ısət məntəğədə həmkari və rabitəon mərkəz hisob bıdə ijən tojə elmon və texnoloqiya sahədə karde bəzne uzvon miyono rabitəon zumand karde və çın təşkilati ğudrəti ziyod kardero çandə rol ifa bıkə.

İroni prezident təkidış kardə: İron həmçınin tranzit və nəğliyyat sahədə ijən puli və banki elm və texnoloqiya, ditəsərrofat, xorakiyə əmniyyət, mədəniyyət, ekoloqiya, turizm və təbiyeyə bəloon vədə muğabilə karde zəminəonədə həmkari karde xoto kamilən de təşkilatədə uzv bıə kişvəron həmkari kardero hozzo mandə.

Ruhani təsdiğış kardə: terrorizm və təkfiri iyən vəhabiyə fikon dınyoədə qıləy mıştərəkə təhdide bəçəy xoto ım bevəcə həğiğəti vədə mubarizə kardero və həmkari karde lozime ijən detosə bə zəmon ki bə əmniyyəti zidd  jıqo təhdid bıbu bo inkişof və iğtisodiyə ozavziyero həm hiç imkoni ni.

İroni prezident həmçınin məntəğədə bohranon həl kardero əcumlə terrorizmi məhv karde əsliyə roonış əştəni bəpe zındiye və xərob əkə riğabətonku bə kəno mande zınəş be və votışe: Yəmən, Əfğanıstan, Suriyə və İrağədə çand hezo nəfəri keşte ijən çand milyoni avarə bey nışo doyə ki məntəğə kişvəron daxıli bohranon və xarıciyə mıdoxiləonku zərər və ziyanon vindəşone.

Həsən Ruhani təsdiğış karde ki EKO iğtisodiyə həmkari təşkilat bo əmnə məntəğə soxteyro ijən bo millətonro cəmi əmniyyəti sayədə çokə fırsəton icod karde xoto vey ğabeliyətonış heste.

Ğeyd bıkəmon ki ımrujnə rujədə çı EKO təşkilati ali rəsmion iclos Pakistonədə bino be.

İron, Tırkiyə, Pakiston, Əfğanıstan, Turkəmənıstan, Ğırğızstan,Uzbəkiston, Ğəzaxıstan, Tacikiston və Azərbaycan Respublika çı EKO təşkilati uzv bıə kişvəro bıən.