Zərif:amerkəvıjon ıştəni ləğləğə nıkən ironədə nizomi əvəz karde siyasət cəvob ədə ni.
İron İslam Respublika xarici koon vəzir Amerkə rəsmi şəxson dəxalətəkə sıxanon vədə ki beynəlxalğə ğanononku bə kənoy və ironi nizomi əvəz karde zərorəti barədəy reaksiyaş nışon do və votışe:ıştəni bə ləğləğə mənən ironi hukuməti əvəz karde mumkin ni.
Amerkə rəsmi şəxson mincumlə Amerkə mudafiyə vəzir James Mattis bı rujonədə elanış kardə be İron və Amerkə miyonədə 2 tərəfə mısbətə əlağon bərğəror kardeyu lozime ironi hakim bə nizom əvəz bıbo.
Muhəmməd Cəvad Zərif zinə şanqo Niyuyurk şəhrədə Amerkə xariciyə əlağon şura təhğiğatiyə mərkəzi iclosədə votışe:Vaşinqton dəvardə rujonku dərsış qətə ni və ıştə sıxanon dəvomədə əlavəş karde Amerkə planon ironi nizomi əvəz kardeyu həmmişə məğlub bedə çunki ironi islamiyə nizom ıştə ğanoni be iyən ğıvvə ironi millətiku kəsb kardə.
ironi xarici koon vəziri işarəş karde ki Amerkə ironədə islamiyə inğilabi səbarz be vaxtiku nizomi əvəz karde siyasətış nəzədə qətə və ıştə sıxanon dəvomədə votışe: ironi millət dəvardə nezə rujonədə ıştə məmləkətdə prezidenti vıjnımonədə 10 saatisə ve sədo doeyu səfədə mandən.
Zərif əlavəş karde məntəğədə heç qıləy məmləkət bənə İron demokırasi roədə hərəkət kardə ni.
ironi xarici koon vəzir həmçinin Amerkə sanqsiyaonış bə ironi sulhin atom bərnamon zid bə karnomə hərəkətış zınə və votışe:Vaşinqton bəpe sanqsiyaon vədə ıştə siyasəton əvəz bıkə .
Zərif votışe: Amerkə bəvədə ki bə İron İslam Respublika zid atominə sanqsiyaonış təşkil karde İron fəğət 200 qılə santırifiyuqış hest bı əmmo sanqsiyaon bəpeştə və muzakiron zəmanədə ım ədəd bə 20 həzo santırifiyuq rəsə.
ironi xarici koon vəzir bə yəmənı bıhron həm işarəş karde və votışe heç kəs yəmənı dave dəvomiku foydə bə dast nibəvay.
Zərif işarəş karde lozim ni məntəğə məmləkəton deyandı deşmenəti bıkən və ıştə sıxanon dəvomədə əlavəş karde yəmənı məsələ həl karde bəzne İron və Səudiyyə Ərəbıstoni miyonədə həmkarətion şərayeti təşkil karde.
