İjən 529 nəfər İronıjə zair bə Mədinə muğəddəsə şəhr vığandə bıən.

Bo Həcci yolə mərasimədə iştirok kardero İronıjə zairon vığande əməliyat ijən dəvomış heste və 2 qılə təyyarə zinə 529 qılə zairi bə Mədinə bardə.

Bə İrna raporti əsos ım 2 qılə təyyarə İroni Tehron və Məşhəd şəhri zaironış bə Mədinə muğəddəsə vırə bardə.

Isət de Mədinə Ayroporti vasitə bə Vəhy sərzəmini varid bıə zairon miğdor bə 23 həzo nəfər rəsə ki 12 həzo nəfər çəvonku 6 ruj Mədinədə mande bəpeştə bə Məkkə varid bəben.

Bə rəse raporton əsos zinə şəv həm de Həccədə Vəli Fəğih nımoyəndə Huccətul İslam Ğazi Əsqəri huzuri Mədinədə Kumey nomo bıə mənəviyə dıvo mərasim bərpo bıə.

Imsor bə 87 həzo nəfər nızi İronıjə zair bo Həcc mərasemi dəvoniyero bə Ərəbiston səfər bəkan.