Qeneral Pakpur: İron icozə nibədoe ki məntəğədə sionist rejim hərbi mərkəzon icod bıbu.
İslamiyə İnğilobi Sepah Təşkilati zəmini ğıvvon kamandir votışe: İron İslam Respublika hiç vaxt icozə nibədoy ki məntəğə kişvəronədə sionist pesoxtə bıə rejimi hərbi iyən kəşfiyot mərkəzon icod bıbu.
Bə Mehr aqentiyəti raporti əsos, zinə və İroni şimol-ğərb, Ərəs nomo bıə məntəğədə Sepah Təşkilati yolə iğtidori manıvri bərpo bey kənoədə, İslamiyə İnğilobi Sepah Təşkilati zəmini ğıvvon kamandir Muhəmməd Pakpur əlovəş karde: iğtidori manıvr, çı dınyo ziyod tələbə ərtışon vədə, İron İslam Respublika silohinə ğıvvon iğtidori nışonəy.
İslamiyə İnğilobi Sepah Təşkilati zəmini ğıvvə kamandir, xarıcion nıfuzi vədə, marzonku İroni hərbiçion mudafiə şı kişvəri zumandəti nışonə elanış karde iyən votışe: kişvəri həmmə məntəğəonədə əcumlə Fars dıyo və məntəğəoni ki kişvəri milli iyən əmniyyəti mənafe təmin kardedən, İroni silohinə ğıvvon manıvr bərpo bəbe.
Qeneral Pakpur ijən təsdiğış karde: İron İslam Respublika əmniyyət və milli mənafeku mudafiə kardey, silohinə ğıvon sıə xət bə hisob omeydə və marzonədə harcurnə əvəzon bə İroni əmniyyət və zumandəti təsir bənoe.
İslamiyə İnğilobi Sepah Təşkilati zəmini ğıvvə kamandir ijən əlovəş karde: ımruj İron İslam Respublika əmniyyəti mudafiyə əkəyon, əsqəron iyən silohinə ğıvvon zumandəti anədəy ki hiç kişvəri bə məntəğə nıfuz kardey əzı ni və istikboriyə kişvəron vədə İron bənə ğoymə ğələy.
Qeneral Pakpur, Ərəs məntəğədə Sepah Təşkilati yolə manıvri bərpo bey, çı İroni silohinə ğıvvon hərəkətonədə qıləy muhimmə manıvr elanış karde iyən əlovəş karde: ım manıvrədə 500 qılə hərbi qıvoninə maşin iyən əbzaron iştirok, məntəğə təcavuzəkə kişvəron vədə, çı mudafiə zumandəti iyən hozzoətiku nışonəy.
Oktiyabrə manqi 17 minnə ruj, Dışəmbə rujədə, İroni şimol ğərb şərği Azərbaycan iyən Ərdəbil ostanonədə bıə, Ərəs umumiyə məntəğədə İslamiyə İnğilobi Sepah Təşkilati zəmini ğıvvon iğtidor nomo manıvri vey muhimmə mərhələ de Sepah zəmini ğıvvon Aşura nomo ğərorqoh mehvəriyəti bino bıə.
Bə İslamiyə İnğilobi Sepah Təşkilati zəmini ğıvvon kamandir Qeneral Muhəmməd Pakpuri votəyon əsos, heliborn, paraşut əməliyaton, şəvədə həmlə, helikopteron canqi əməliyot, intihor və canqi dronon həmçınin Ərəs nomo bıə ru səpe pard soxtey və rabitə caddəon kontrol kardey əməliyaton əcumlə ım manıvri muxtəlifə baxşonin.
