Tolışə təşkilaton İronədə de terroriston hucumi əlağədar bə İroni xalqi ıştə həmdardi izhar kardəşone
İyuni 7-minə ruj İronpərvər cəmiyyəti dıli bə ğəm vardə de qıley xəbə bino be. De beynəlxalqə terrorizmi mudafiə kardə ğıvvon təhriki İroni İslamiə Şura Məclisi binadə və rəhmətinə imom Xomeyni pokə ocəğədə terrorə hərəkət kardışone. Çimi nəticədə 12 nəfər şəhid , 39 nəfər zəxmin bıe. İroni Əmniyyətə Vəzarəti preventiv tədbiron nəticədə 3-minə terrorçiə qrupi və səşone, imkan doəşon ni ki, əvon ıştə cinayətə əməli ıçra bıkon.
Im façıə Tolışə cəmiyyəti arədən bə norohəti səbəb bıe. Rusiyadə "Tolışə diaspora" təşkilati sərdar İsmayıl Şabanov, Yekaterinburği Tolışə Milliə Mədəniyyətə Muxtariyyəti sədr Elşən Həsənov, Azərbaycan Respublika Tolışə Mədəniyyətə Mərkəzi sədr, həmən "Tolışon sədo" rujnomə redaktor Rafiğ Cəlilov bə həmə İroni xalqi və şəhidon ailə, bə çəvon nezə odəmon ıştə həmdardi votışone, bə zəximin bıə odəmon xıdoku şifo orzu kardışone.
Im terrorə hadisə sosial şəbəkonədən bə əks-sədo səbəb bıe. Tolışə qruponədə yuzeron həm ım hərəkət məhkum kardışone, həmən Az.R cəmiyyətədə bəzi bə ironəfobiya mərəzi mubtəla bıə odəmon ğeyri - insonə fikron laqığinə cəvob doşone.
