Ərbəin ziyarəti əzəmət sorbəsor zumand bedə

Ərbəini ziyarət insoni komil və sof kardedə. Har qıley Əhli - Beyt (ə) aşiği orzue ki, ım ziyarətədə iştirak bıko. İmom Huseyn (ə) bə zulmi əleyh usyan kardışe, şəhid bıe. Çey aşiğonən bəpe çe ədli tərəfədə bımandon, bə nohəxi və zulmi əleyh mubarizə bıbon.

Ərbəin səfəri musafiron iqlə Əhli - Beyt (ə) aşiğono ibarət bedəni. Əhli-təsənnum və xristianə əhali numayəndonən bı səfərədə iştirak kardedən, çe ım ziyarətiku boştə foydə peqətedən. Demiən vində bedə ki, Ərbeyini ziyarət həmə bəşər evladon həmrayəti kardə qıley səfəre. Ponə sori çe Amerika "Huffington Post" rujnomə etiraf kardışe ki, Ərbəini ziyarət çe dınyo ən əzəmətin və izdihaminə etiğadə mərasime. Ki de əsil , həğiğiə islami oşino be pidəşebu bışo Ərbeyiə səfərədə iştirak bıko.

Çe islami jıqo əzəmətinə mərasim şe-şe çe dınyo cəmiyyəti nəzər və diğğəti cəlb kardedə. Imsor çe Amerika Konqresi Numayəndon Palata sabiğ uzv Sintiya Enn Makkini bə Ərbəin səfəri umjən qıniə. Ey ıştə "Fasebook" səhifədə nıvıştəşe ki, Ərbəinədə iştirak kardeədə məğsədış de İmom Huseyn (ə) irsi hartərəfin oşino beye.

"Faktxəbər" sayt məlumat dodə ki, çe Rusiya siyasərmədar Beynəlxalğə Avrasiya Hərəkati sərdar Aleksandr Duqin de Ərbəin səfərədə şəxsən iştirak karde məğsədi bə İrağ omə.  Ey bə çıvrey mətbuati numayəndon votəşe ki,  "az çand sor bıe ki, Ərbəini həxədə məsedəbim və bı tədbirədə iştirak karde pidəmbe. Imsor deştə duston ım orzu icra karde barədə bə ğəror omimon. Bəşəriyyəti bə mənəvi və ilahi inğilabi ehtiyac hestışe. Çoko ki, İronədə İslamiə İnğilab bə mənəvi intibahi səbəb be, çəmə pravoslav xristianonən bə jıqo qıley mənəvi rosbemoni ehtiyac hestımone".