Şiiə yolə alimon
Şiyə dınyo yolə alimon-169
Şiiə yolə alimon
Hicri-Ğəməri 1332-ə ya həmonə Milodi 1914-ə sori İminə Dınyo Canq bino be və çəy bədiqə çı Mirza Muhəmməd Təği Şirozi mərcəiyyət de ingilis iyən deçəy mıttəğfiğon bə İslomi məmləkəton bıə oşkoə huicumi bə zəmon be.Mıttəfiğon ğıvvon bə osmani imperaturəti muharibə elonışon karde və çəy bəpeştəİslomi alimon iyən mərcəye-təğlidon bo İslomi sərzəminon diof iyən mıdofiyəto cihodi fətvoşon sadir kardeşone.bın soronədə Mirzaye Kuçək səy kardeşone de Nəcəf iyən Kərbəlo alimon miyono qıləy ittifoğ iyən ibemon icodko və çı kuffori bə islomi sərzəmin iyən mısılmınon təsəlluti vəy bıqəton.əv bəştə məğsədi rəseyro ıştə fərzəndonış bə canqi meydonış vığande.əmmo ço sori bədiqə yəni Hicri-Ğəməri 1366-ə sori osmani imperiyə dəboxtşe və məğlub be və ğalibə tərəfon yəni inqiliston və çəy mıttəfiğon bə məntəğə milləti tələbon dığğət nıkardə holədə çı inqilistoni bə İraği bıə ğəyyumətiş bə rəsmiyyət zıneşe.
İqiliston ki,canqi soron dırozi bə ziyodə ixtisodi ziyonon dıço bıəbe,çı qıləy ro dumo be ki,işğal bıə sərzəminon de qıləy şivə idorəko ki,qıləy kamə xarcış bıbu.co tərəfiku bənə İraği bıə islomi sərzəminədə bə inqilsitoni istemori zidd ğıyomon ijən dəvomış hestebe və alimon de İnqilistoni mıxolifət kardeyku dast kəşeydə nıbin və ım vəzyəti kontrol iyən bəy nəzorət kardey bo inqilistoni vey saxt və çətin bıəbe.liza inqilistoni siyosətmədoron bə ğərol omin ki,de qıləy İntixobot iyən vıjnemoni bərpo kardey,ikəsi bə İrağ mısəllətkon ki,zohirədə çı milləti səçın kardə kəs bıbu,əmmo həyğətədə çı istemorə inqilistoni siyosəti təğibko.İslomi alimon ki,piyə istemorə inqilistoni siyosətonku xəbədo bin,de şiddəti de ın vıjnemoni ıştə mıxolifətışon nışon doe.Dıminə Mirza həm ki,bın soronədə şı Şiyə tammə mərcəiyyətış bəştə ehdəş peqətəbe,de qıləy fətvo sadir kardey elonış karde ki,hiç qıləy mısılmoni həxış ni qıləy ğeyri-mısılmoni boştə hukmron iyən çəy bə mısılmonıon bıə hakimiyyəti ğəbul iyən səçınko.
De Dıminə Mirza ım fətvo bə I zəmon çəy zoə Muhəmməd Rıza Şirozi ki,ıştə pı tərəfiku məmur bıəbe irağədə milli ğıvvon bə sə-səhmon dəno,Kərbəloədə “Cəmiyyəte-İslomi” nomo qıləy təşkilotış icod karde ki,çı İraği məşhurə ruhaniyon əyo şirkət iyən iştirok kardedəbin.çın qrupi hədəf iraği məmləkəti ozod kardey iyən de İqilistoni ğəyyuməti iyən yolyəti mıborizə bardey be.qıləy kırtə mıddətədə ım cəmyəti uzvon oqətey bin və bə Hindıston dərbədər kardey bin. Dıminə Mirza bə ğərol ome bə İron bışo və çəyu çı cihodi fətvo bıdo və de inqilistoni istemori mıborizə bardey məsələ elonko.bın koyədə çı Nəcəf,Kərbəlo iyən Kazımeyniku bıə İraği alimon həm deəy həmray bin.çın hərəkəton bəpeştə İraği inqilisə yolon ki,vəzyətışon yavə mışohidə kardeşone,həmonə dərbədər kardə bıə kəsonışon çı ço manqisə həm qıləy kamə mıddətədə bə İrağ oqordıneşone……
Mirza Muhəmməd Təği Şirozi Hicri-Ğəməri 1338-ə sori qıləy holədə ki,çəy de bərəkəti pur bıə umriku həşto sor dəvardedəbe,çı mıəborizən qıləy nuyə prosesış bino karde.Dıminə Mirza Nəcəfı-Əşrəfədə çı alimonku I dastə,çı əşirəon yolon iyən Miyonə Furati rəhbəronış bə qıləy məhrəmonə iyən məxfiyə iclosi dəvətış karde.əvon həmonə cələsədə bə ğərol omin ki,de istemorə inqilistoni mıborizə bardeyro qıləy nuyə mərhələ ojkon.çın hədəfi cəhətədə Mirza Muhəmməd Təği Şirozi de qıləy fətvo çı inqilistoni ğəyyuməti jiyədə ko kardeyış bo mısılmınon həromış hisob karde.çın fətvo bədiqə ziyodə koəvonon ıştə idoəronku istefo doşone və de zəmoni dəvarde ım proses ziyod be.Dıminə Mirza bə İraği kişfəri mısılmınon qıləy noməş nıvışte və əvonış bə sulhamizə mitinqon bərpo kardey səmt dəvətış karde.Əv çı millətiku tələbış karde de bə əmniyyət iyən oroməti rioyət kardey,ıştə tələbon min cumlə İslomi Respublikə bərpo kardey və həmçinin çı İraği məmləkəti istiğlol və suverinəti tələbkon.
Deməkə ki,ım etırozinə mitinqon sulhamiz be,əmmo ingilisə hərbiçiyon çı millətiku I nəfərışon de qullə vositə jeşone və ım ko boyis be ta çı İraği yolon iyən alimon bə istemorə inqilistoni zidd ıştə etırozon dıminə devrə binokon.Dıminə Mirza həm de qıləy nomə çı alimonku tələbış karde ki,çı milləti həxə tələb kardeyədə çı hiççiku tarsışon nıbu.bın mıborizəonədə çı Dıminə Mirza fərzənd həm de coqlə yonzə nəfər mıborizi dastqir kardey bə dərbədər kardey bin.de ın holi ijən Dıminə Mirza çı istemorqərə inqilistoni mığobilədə təslim bıeyış hərom elonış karde və hətto qıləy vırədə ıştə silohi cihod bardey koyış həm elonış karde…
