İroni xarıci vəzarətxonə sıxənəvot bə Ərəb Liqa rəisi sıxənon reaksiya nışoş do.

İroni xarıci vəzarətxonə sıxənəvot votışe: İron de məntəğə əksəriyət kişvəron iyən ıştə hamsoyəon tərazin rabitəon ijən bə iştirokə mənafe əsosi əloğəonışe və ım qıləy kanə dırozmıddətə siyasəte.

Bə İroni xarıci vəzarətxonə mediya diplomatiyə idorə raporti əsos, İroni xarıci vəzarətxonə sıxənəvot Bəhram Ğasımi zinə Ərəb Lqa rəis Əhməd Əbolğeyzi tojə bəyonaton reaksiyaədə əlovəş do: İron İslam Respublika komək və tələb vəzyətədə har zəmoniku vey məntəğə kişvəron kənoədə be və de çəvon dıvləton və milləton sazəndə rabitəon dumoədə be.

Ğasımi bə Ərəb Liqa rəisi xətob votışe: "tı ərəbə kişvəron ittifoği rəisiş, nə bəzi kişvəron siyasəton təbliğəkə ki de ım həssosə məntəğə mısılmonon iyən ərəbiyə mənafe və sərnıvışt həmohənq ni".

İroni xarıci vəzarətxonə sıxənəvot təsdiğış kardə: ərəbə kişvəron ittifoği rəisi bəyonaton həğiği və əsliyə məsəkəson bəpe həmonə kişvəron bıbun ki har sor çand milyard dollar ıştə milləti pul iyən sərvəti bo yolə kişvəronku əmniyyət hırye xərv kardən.

Ərəb İttifoği rəis "Miyonə Şərği diyaloqon " iclosədə ki Romaədə çı İtaliya xarıci vəzarətxonə kəxıvandəti tərəfo bərpo bıə, ıştə sıxənonədə məntəğə ərəbiyə kişvəroniku itərəfiyə tərəfdorəti karde vositə İroni rəftori əvəz bey tələbış kardə.