Ərəbıston 20 həzo hırdəni Yəmənədə kıştəşe.

Yəməni qıləy siyasi fəal, bə ərəbıstoni tojə hərbi həvoiyə hucum işorə karde bəpeştə votışe: Ali-Səudi hucom, mıhosirə iyən cinoyəti nəticəku, de tosə bə ısət 20000 nəfər çı Yəməni hırdənon ğətlıam bən.

Yəməni qıləy siyasi fəal, Huseyn Əl-Bəxiti, de Peres Tv mısohibə karde votışe: de Ərəbıstoni mıhosirəon dəvom pəydo karde, ısət çand həzo nəfər çı Yəməni qədə hırdənon, Malariya və Vəba noxəşəti ijən de nosolimə xorakon istifadə karde xoto həlok bən.

Əl-Bəxiti izohış do: qıləy şərayitədə ki dınyo kişvəronədə bıə cəmaəton, tojə sori xoto bə şoyvonəti karde məşğulin, əmmo Ərəbıston bə Yəməni əhali zidd hıcum karde dəvom dodə.

Huseyn Əl-Bəxiti, bə Ərəbıstoni cinoyəton peştədə bıə Amerika, İnqiltərə və Fransə himoyəon işorəş kardə ijən əlovəş kardə: de tosə bəfaxti ki jıqonə himoyəon dəvomış bıbu, Yəmənədə canq bə oxo nibərəse.

Əl-Bəxiti, Ərəbıstoni cinoyəton barədə çı beynəlxalğə təşkilaton sukuti məhkumış kardə iyən votışe: Yəməni canqi barədə hələ hiç təhğiğ ya rəsmi təğibon bino bıə ni.

Huseyn Əl-Bəxiti bə ım canqi 2 sor dəvom pəydo karde işarəş kardə və təsdığ karde: de tosə bə ışət ım canq 35000 nəfəri kışte boyis be.

Huseyn Əl-Bəxiti həmçınin bə ım nuktə təkid karde ki, bə Yəməni milləti zidd Ərəbıston ıştə bombardemonədə, çı zəif bıə uraniku istifodə kardedə ijən votışe: ısət Yəməni şımalədə bıə Həccə, Sədə və co vırəonədə, Yəmənıjə moəku bıə hırdənon həmonə ğədəğən bıə silohon nəticəku movardə problemışon heste.

Im Yəmənıjə siyasi fəal ujnən çı dınyo iştimaiyəti tələbış kardə ki, bə Yəmən xorək və damon imkanaton vığandeyro zəminəon hozzo bıkən ijən çı kişvəri mıhosirəon barışton.

Ərəbıstoni hərbi həvoku bombardemonon ısət bə 2sori neze ki bə Yəməni milləti zidd dəvom pəydo kardedə.

Ərəbıston pidəşe ki çı Yəməni istifo doə prezidenti, Əbdurrəbeh Mənsur Hadi ki bə Ərəbıston vabəstə heste ujnən Yəmənədə hukumət bıkə, və hol ımki Yəməni millət tələb co çiye.