İraği Mosul şəhriku DAEŞ-i uzvon bo vite bino kardəşone.
İraği polis ğıvvon fərmondə Şakir Codət elanış kardə: İraği hərbi təyyarəon Yanvari 3-ədə, çı DAEŞ terroristiyə qrupi cəmi surətədə vite səhnəon kəşəşone. Əv votışe həminə filmədə məlum be ki DAEŞ-i uzvon deştə maşin və hərbi imkanaton, Mosuli cənub şərğ məntəğonədə bıə Əl-Vəhdəku bə Furati ru kənoədə bıə Əl-bəəs məntəğə fəror kardəşone.
Bə Əl-Aləm raporti əsos, İraği canq təbliğati ğərorğoh həm tojədən çı Mosuli şərğiyə məntəğonədə bıə Əl-Məarız məntəğə, sahilədə bıə qıləy ticari vıjor, çand qılə sənaye vırə, Mersedes kompaniya ijən Əl-Kiramə məntəğədə bıə ordə fabrika ozod kardeku xəbəş do.
Neynəva ostaniku həm xəbə omə ki, DAEŞ trroristiyə qrupi informasiya ərosnə kamisiya yol ijən çəy 2 qılə həmkaron Mosuli şərğiyə məntəğonədə bıə Əl-Kiramədə de İraği ğıvvon əməliyati həlok bən.
Həminə xəbədə omə ki, DAEŞ ısət ıştə mediyaiyə fəalonış bo canq kardero hozı kardedə.
De İraği 1-nə vəzir Heydər Əl-İbadi əmri bərobər, dəvardə sori Oktiyabri 17-nə rujiku, Mosuli ozod karde əməliyat, 7 qılə cəhətiiku bino be.
Dəvardə 2 manqi mıddətədə, İraği hərbiyon mıvəffəğ bən ki Mosuli vey diyon iyən vırəon ozod bıkən.