Ərbəine Huseyni(ə) şemoni Mərosim, İroni kişvəri vəzir iyən İraği iminnə vəziri votımoni mehvər.
Zinə İroni kişvəri vəzir Əhməd Vəhidi və çəy bə ico bıə heyət de İraği iminnə vəzir Mustəfa Əlkazımi vindemonışon karde iyən 2 tərəf Ərbəine Huseyni(ə) şemon barədə de yande votımonışon karde.
Imsor Şəhrivərə manqi 26, (Hicri Ğəməri 1444 minnə sori səfə manqi 20, miladi 2022 minnə sori sentiyabri 17), Kərbəloədə şiəyon 3 minnə İmom Həzrət İmom Huseyn(ə) və çəy bəfodorə əshobi şəhodəti 40 minnə ruje, və de diğğə bə zəmini marzon oj bey ki korona virusi bıhroni bəpeşt iminnə kərəro əncom bıə, ımsor İronıjə zairon Ərbəine Huseyni(ə) şemoni iştirokiro veyə hərorətin iyən şovği soybin.
Dəvardə soronədə, mısılmonon və vo İlahi dinon tərəfdoronku kali, bə İmom Huseyn(ə)-i şəhodətə Ərbəini çand ruj mandə, de şemoni royku Nəcəf iyən İraği co şəhronku ıştəni bə Kərbəlo və İmom Huseyn(ə)-i pokə hərəm rosniyedən.
Bə İrna raporti əsos, Əlkazımi təşkilat elanış karde: ım vindemonədə İraği iminnə vəzir və İroni kişvəri vəzir, 2 qılə kişvəri miyono rabitəon, 2 tərəfiyə həmkoətion roon zumand kardey iyən mıştərəkə həmkoətionku himoyə kardey məsələon barədə de yande sıhbətışon karde və ğəror bıə ım məsələon 2 qılə milləti mənafe cəhətədə bıbu.
Im vindemonədə Ərbəine Huseyni(ə) zairon varid bey hoston kardey, həmohənqion, çəvon sakın bey və himoyə barədə bə İraği tərəfo cəhdon işorə bıə.
Im vindemonədə Əhməd Vəhidi təkidış karde: həmmə baxşonədə Tehron-Bəğdad miyono həmkoəti zumand kardey vey əhəmiyyətışe.
Cımə rujədə İroni kişvəri vəzir de İraği kişvəri votımoniro bə Bəğdad varid bıə.
Ərəbine Huseyni(ə) zairon vəziyəti barədə de İraği rəsmi şəxson həmohənqi və bə əovn veyə xıdmət rosniye həmohənqion əncom doey, Vəhidi səfəri bə İrağ səmti illətonku bə hisob omeydə.
