İroni kişvəri vəzir: 3 milyon Ərbəyine Huseyn(ə)-i zayiron, İroniku bə İrağ şən.

İroni kişvəri vəzir votışe: tosə bə ısət Ərbəyine Huseyn(ə)-i şemonədə iştirokiro, 3 milyon Ərbəyini zayir İroniku xarıc bən.

Hicri Ğəməri 1444 minnə sori səfə manqi 20, miladi 2022 minnə sori sentiyabri 17, Kərbəloədə şiəyon 3 minnə İmom Həzrət İmom Huseyn(ə) və çəy bəfodorə əshobi şəhodəti 40 minnə ruje, həminə rujədə çand milyon zair İmom Huseyn(ə)-i pokə hərəmi ziyorət kardeyro bə İraği cənubədə bıə Kərbəlo şəhri səfər bəkan.

Dəvardə soronədə, mısılmonon və vo İlahi dinon tərəfdoronku kali, bə İmom Huseyn(ə)-i şəhodətə Ərbəini çand ruj mandə, de şemoni royku Nəcəf iyən İraği co şəhronku ıştəni bə Kərbəlo və İmom Huseyn(ə)-i pokə hərəm rosniyedən.

Çand ruj bə Ərbəyine Huseyn(ə)-i mandə  ziyiron səfəri bə Kərbəlo muğəddəsə şəhri bəştə pikədə rəsedə.

Bə İrna raporti əsos, Seşəmbə rujədə İroni cənub ğərb, Xozıston ostan Şələmçə marzi terminalədə, İroni kişvəri vəzir, Əhməd Vəhidi de jurnaliston votımonədə əlovəş karde: bə Ərbəyine Huseyn(ə) nez bey xoto, Ərbəini terminalonədə, Ərbəine Huseyn(ə)-i zayiron mığdor ki ğəsdışone bə İrağ səmti bışən əlovə bıə.

İroni kişvəri vəzir bəyonış karde: İroni har 6 qılə marzi terminalonədə de İraği kişvər çokə şəroyet bərğərore. və Ərbəyine Huseyn(ə)-i şemoni mərosimədə 1 milyono 450 həzo zayir iştirok kardışone ki holihazırədə 6 qılə marzonku bə kişvər oqardey holədən.

İroni kişvəri vəzir, xarıci təbəon zayiron şe-omey problemon barədə əlovəş karde: Əfğanıstonıjə zayiron şe-omey həl bıə iyən Pakistonıjə zayiron həm karde bəznen zəmini marziku bə İrağ səmt bışən.