İrağ və Suriyə rəsmi şəxson miyono əmniyyəti iclosi bərpo bey.

İraği sərhədd əıvvon fərmondə, de Suriyə sərhədd ğıvvon fərmondə qıləy iclosi bərpoş kardə. Im iclosədə harcurnə terroristiyə hərəkəton benəticə və məhv iyən marzon mıhkəm kardey barədə sıhbət bıə.

Dəvardə soron mıddətədə, İrağ və Suriyə DAEŞ terroristiyə qrupon vədə deştə muğaviməti iyən səbarzəti vositə elanışon kardə ki DAEŞ terroristiyə qrupon dastiku ıştə həmmə ərazi ozod kardedən, əmmo kali məntəğəonədə DAEŞi uzv bıə amilon mande iyən co qılə kişvəronku tojədən terroriston bə İrağ və Suriyə varid bey təhdid, 2 qılə kişvəri rəsmi şəxson niqəroni bois bıə.

Bə dışəmbə ruji Əlaləm kanali raporti əsos, İraği sərhəddi kamandir, Hamed Əbdullah İbrahim Əlhuseyni de Suriyə sərhəddi kamandir Ğəssan Məhmud vindemonışon kardə, ım vindemonədə 2 qılə kişvəri mıştərəkə marzon əmniyyəti təmin kardey, harcurnə terroristiyə hərəkəti vəy qəteyro həmkoətion zumand kardey iyən marzon əmniyyəti cəhəto əməliyaton dəvom doey barədə sıhbət be.

Ğəssan Məhmud bəyonış karde ki İrağ ıştə marzon əmniyyət, iyən 2 qılə kişvəron miyono ğaçağ əməliyoton vəy qəteyro ıştə həmmə cəhdon əncom dodə iyən votışe: nəzorətəkə sistemon komil kardey bəpeşt, ısət İraği marzon əmn iyən stabile.

İrağ və Suriyə əmniyyəti hərbiçion həmişə DAEŞ-i amilon nıfuzi vəy qəteyro, ıştə kişvəri həmmə məntəğəonədə bə DAEŞ mandə terrorçion təhğiğ, pok iyən məhv kardey, məşğulin.