Ğətərədə İroni ixtisosiyə nımoyeşqoh bino be
Ticarət, məədən və sənaye vəzarətxonə sıxənəvot, Ğətərədə bıə İron İslam Respublika ixtisosiyə nımoyeşqoh bino beyku xəbəş do.
Ticari, məədən və sənaye vəzarətxonə sıxənəvot, Umid Ğalibaf votışe: tosə Miladi 2022 minnə sori fıtbol çempionat riğabəton bino beyku bənav, Ğətəri Dohaədə İroni nımoyeşqoh oxonə nımoyeşqoh bə hisob omeydə, bə həminə cəhət dəvardəku vey ım nımoyeşqohku, co kişvəron ticari nımoyəndəon vindemoni fırsət icod bıə.
Bə Tele-Rədio aqentiyəti raporti əsos, Ğalibaf ijən əlovəş karde: Zinə rujiku, yəni Mehr manqi 25 minnə ruj, İron İslam Respublika ixtisosiyə nımoyeşqoh ko bino bıə və tosə Mehr manqi 28 minnə ruj dəvomışe.
Im nımoyeşqohədə, İronıjə şirəkətonku 12 qılə şirkət, əmtəə, xorək sənaye, dasti sənaye, ticari və sənaye həmuş kardey otəşi vey bə inkişof rəsey sistemon bimə, zəfəron, pust, nat və qazi texnoloqiya, ıştən zumandətion və əmtəəon, mərağin vindemonədə ğərorışon do.
Ğalibaf Ğətər kişvərədə Fıtboli çempionat riğabəton bərpo beyku turizm və ticari bə inkişof rosniyero, bənə qıləy mislış nıbıə fırsət yodış karde və votışe: ğərore ım nımoyeşqoh kənoədə muxtəlifə mıvzoon barədə de Ğətəri tərəfon ticari muzakirəon əncom bıbu.
Zinə Ğətəri Dohaədə İron İslam Respublika ixtisosi nımoyeşqoh, de İroni prezidenti iğtisodi muavin, Muhsen Rezai və Ticari və bə inkişof rəsey təşkilati rəis, Əlirıza Peyman Paki iştirok bino bıə.
