De terrorizm mubarizə bardey iyən mıştərəkə marzon əmniyyəti barədə, İrağ və Suriyə məşvərəton

Suriyə xarıci vəzir və İraği xarıci vəziri mışovir, məntəğədə bə de terroristiyə qrupon mıştərəkə mığubilə kardey dəvomi təkidışon kardə.

Milodi 2017 minnə sorədə DAEŞ iyən co qılə terroristiyə qrupon, Suriyə və İrağədə hevujə terroristiyə əməliyaton əncom doey və ım 2 qılə kişvəron veyə məntəğəon işğol kardeyku 4 sor bəpeşt, məğlub bıən, əmmo de ım vucud tosə bə ısət, İrağ və Suriyədə terroriston kali qrupon və çəvon vey muhimmə amilon bə əmniyyəti hərbiçion və ğeyri hərbiçion ələyh əməliyatoni əncom doey holədən.

Bə Suriyə Əlsorə rujnomə raporti əsos, Deşəmbə rujədə, Suriyə xarıci vəzir, Feysəl Əlmeğdad de İraği xarıci vəziri mışovir Ədi Əlxeyrullah vindemonədə, 2 qılə kişvəri miyono marzi əmniyyəti təmin kardey, 2tərəfi rabitəon, mıştərəkə həmkoətion, məşvərəton və həmohənqion barədə de yande votımonışon kardə.

Im vindemonədə, Feysəl Əlmeğdad bə Suriyə kişvəri ələyh terroristiyə canqi cərəyonədə, zərəl-ziyon varid bey, bə ım kişvəri milləti ələyh ğərbion icbor bıə iğtisodi sanksiya faciə hodisəon, əcumlə Amerkə sanksiyaon bə Amerkəvıjə prinsipon əsos ki bə Ğeysər məşhure, bəyonış kardə.

İraği xarıci vəziri mışovir ijən bə 2 qılə kişvəri bıvəti iyən torixiyə rabitəon işorəş karde iyən ım rabitəon zumandətiro və 2 qılə milləti mənafe cəhəto de terrorizm mubarizə bardey baxşədə bə mıştərəkə hərəkəton zərrurət təkidış karde.

Im vindemonədə, Suriyə nəğliyot vəziri muavin Əmmar Kəmaluddin, Suriyə xarıci vəzorətxonə koon mudir, Riyaz Əbbas, Dəməşğədə bıə İraği səforətxonə koəvon Yasin Əlhəcimi və İraği dıvlətiku vığandə bıə heyəti uzvon həm iştirokışon be.