Qeneral Tənqsiri: Fars dıyoədə əmniyyət de məntəğə inteqrasiya vositə əncom bəbe
İslomi İnğilobi Sepah Təşkiloti dıyo ğıvvə komandir votışe: Fars dıyo iyən Hormozi tanqədə əmniyyət icod kardey de məntəğə həmkoəti və inteqrasiya əncom bəbe və Fars dıyoədə bə beynəlxalğə kişvəron ğeyri ğanuni iştirok ehtiyocış ni.
Farsi korfez bənən dıyo vey muhimmə roy, həmişə siyosi vey məşhurə mıvğiyəti soyb be və ımruj həm bənə dınyo beynəlxalğə vey muhimmə ov roy zıney bəbe.
Bə Fars aqentiyəti raporti əsos, cımə rujədə, İslomi İnğilobi Sepah təşkiloti dıyo ğıvvə komandir admiral Əlirıza Tənqsiri Farsi dıyo Nazeat ləpəonədə de iştirok kardə ğıvvon vindemonədə bəyonış kardə: həmişə İslomi Respublika siyosət, behronin be və əmələdə həm həmişə ım mevzu subit bıə, əv ijən Farsi dıyoədə stabilə əmniyyəti icod kardeyədə bə Sepah təşkiloti dıyo ğıvvə məxsusə rol təkidış kardə.
Admiral Tənqsiri ijən Sepah dıyo ğıvvəku bə İroni həmmə ğıvvon komandiri rozi bey işorəş kardə və votışe: iftixori vey barzə medal İslomi İnğilobi Yolə rəhbəri rozi beye.
İslomi İnğilobi Sepah təşkiloti dıyo ğıvvə komandir ijənn təkidış kardə: Fars dıyo iyən Hormozi tanqədə əmniyyət icod kardeyədə Sepah dıyo ğıvvə zoti məmoriyət ıme be ki ıştə məmoriyət vey çok surət əncom bıdə və ım royədə Sepah dıyo ğıvvon ıştə coniku həm dəvardey hozzoin. Admiral Tənqsiri həmmə dıyo ğıvvonku ki Fars dıyo iyən Hormozi tanqədə əmniyyət və İslomi Respublika ovi marzonku mudafiə kardedən ğədrdonətiş kardə.
