Ərəbistoni əmniyyətiyə ğıvvon hucum bə ım kişvəri Ələvamiyə şiəyon ijən dəvomış heste; rəketiyə hucumi nəticəku Ələvamiyədə qıləy məçit otəşış qətə.

Ərəbistoni Nəbə televeziya kanal elanış kardə: bə Ələvamiyə məntəğə bepənohə sakinon əleyh Ali Səud rejimi hərbion hucum çın rejimi zəifəti və əxloği cəhətiku tənəzzuli sabitış kardə.

Bə İrib raporti əsos ım kanali raportədə bə Ərəbistoni hərbiyə tojə manevr işorə bıə ijən ğeyd bıə ki həminə hərəkəton fəğət çı Ərəbistoni muxalifon iradə vədə Ali Səud rejimi məğlubiyətiku əlomətdore.

Nəbə nomo bıə televeziya kanal təsdiğış kardə: Səudi Ərəbistoni hərbion ğudrəti barədə iddiyaon qıləy holədə elan bıdə ki əvon 23 ruji bəpeştə hələ çı Ələvamiyə məntəğə kontrol kardeku ociz mandən.

Im kanal Səudion tojə əməliyaton barədə bə herdənon və jenon hucum karde xoto tənğidışon kardə ijən çın rejimi məğlubiyət və zəifəti barədə co qılə əlomət zınəşon bıə.

Tojədən çı Ərəbistoni mediyaon kişvəri şərğədə Ğətif məntəğədə bıə Miyas nomo bıə vojorədə qıləy maşini tıpniyeku xəbəşon do.

Ərəbistoni kişvəri vəzarətxonə həminə tıpemon hadisə məsuliyəti bə ohdəş qətə ki məvuj 2 nəfəri kışte boiys bıə.

Bə Ələvamiyə şiəyon hucum karde nəticəku xəbə omə ki rəkıtiyə hucumon bəpeştə, ım məntəğədə bıə Şeyx Muhəmməd Ben Nemeri məçit otəşış qətə.

Ərəbistoni hərbion Mayə manqi 10 minə rujiku Ərəbistoni şərğiyə şəhronədə bıə Şiə ənıştə məntəğəon mıhosirə kardəşone ijən Ələvamiyədə hətto canqiyə vəziyəti soxtəşone.