İroni portonku ijən xorəkiyə məhsulon bə Ğətər sadir bıdə.

İroni Buşehr ostani porton və dıyo nəğliyat idorə rəis votışe: İroni 350 ton sadiratiyə xorəkiyə məhsulon de 3 qılə bumiyə qəmion İroni Buşehr ostani portonku bə ğətər vığandə bıə.

Bə İrib raporti əsos Muhəmməd Məhdi Bonçari de işorə karde bə ım ostani portonku eksport bıə xorəkiyə məhsulon təkidış kardə: ım 350 ton xorəkiyə məhsulon ko, xıyo, zımıstoni, qamək, kərtof, kavor, kələm və pamadoriku iborətin.

Bonçari bə ım nuktə işorəş kardə ki Buşehri porton çı Ğətəri portonku vey kamə fasiləşon heste jəqo ki İroni Əsəluyə və Ğətəri Nəxl Təği porton miyono fəğət 148 mayl fasiləşone.

İroni Buşehr ostani porton və dıyo nəğliyat idorə rəis təsdiğış kardə: İroni Buşehr və Ğətəri porton miyono ticariyə mıbodiləon vey çı məntəğə iğtisodiyati ronəği bois bıdə ijən bo taciron və fəalon vıyə hozzo iyən bıstən-həvateyro vey təsirış bəbe.

Çəy bəpeştə ki bəzi Ərəb kişvəron de Ğətər ıştə diplomatik rabitəşon ləğv karde, Ərəbiston, Bəhreyn, Misr və İ Bıə Ərəbon Əmirti Ğətəri bə sanksiya noəşone ijən bə Ğətəri tərəf həmmə zəmini, dıyoi və həvoiyə roon bastəşone.