Yəməni canqədə ğıbon bıə hırdənon barədə Yunisefi statistika.

Yəmənədə Yunisefi nımoyəndə votşe: Səudi Ərəbistoni bombardemini bino beyku Yəmənədə 1700 qılə beqınohə hırdən kıştə bıən.

Yəmənədə Yunisefi nımoyəndə Meritkesel Rilano bə Raşa Tudey Aqentiyəti votşe: fəğət dəvardə 2 manqi mıddətədə iyən canqi nəticəku 38 qılə hırdən yəmənədə kıştə bıən.

Rilano bə Yəmənədə canqi dəvom peydo karde jentonədə bıə xətəron iyən davon vəy qəte zərorət işorə kardə ijən təsdiğ kardə: hırdənon iyən ğəyri hərbiyonku veyni ısət canqiyə məntəğoədə ğiriftor bıən.

Yəmənədə Yunisefi nımoyəndə ım kişvərədə ğıbon bıə hırdənon rəsmi miğdori çımiku vey zınəş be ijən Yəmənədə bıhronon həl karde əsliyə roonış muzakirə elan kardə.

Əv bəzi zəmini roonku bə ğəyri hərbiyon beynəl xalğiyə koməkon rosniye işarəş kardə ijən təsdiğ kardə: bə ğəyri hərbiyon rəsey xoto iyən bəvon komək kardero bə mıhosirə bıə məntəğon rəse vey saxte.

Rilano ijən votşe ki Yəmənədə bə nim milyon nəfər nezi millət vəbo noxəşəti qətəşone.

De Amerka himoyə və koməki, Ərəbıstoni hərbiyon 2015-nə sori Martiku həm bə Yəməni milləti əleyh hucum iyən bombardemoni binoş kardə və həm ım kişvəri millətış zəmin, həvo və dıyoku mıhasirəş kardə.