İraği Əlhəvicə şəhrədə DAEŞ terrorçiyə qrupi tojə cinayət.

İraği Kərkuk ostaniku məhəlliyə mənbəon elanışon kardə: ım ostani cənubədə bıə Əlhəvicə məntəğədə DAEŞ terrorçiyə qrupi tojə cinoyəti nəticəku 12 qılə ğəyri hərbi edom bıən.

İraği Əssumeriyə Niyuz xəbəriyə mərkəz elanış kardə DAEŞ terroristiyə qrup uzvon ım 12 nəfəri çimiku bənav dəstğir kardə bıən ijən zinə əvoni Əlhəvicədə bıə Əlbəkarə nomo hərbiyə bazaədə edom kardeşone.

DAEŞ terroristiyə qrup ijən təhdidiş kardə ki ıştə həmmə məhbuson edom bəkay.

Im cinayət qıləy şərayetədə əncum bıə ki İraği mıştərikə hərbi əməliyaton fərmondə Cəbbar Əlmoəmvəri vey rə çı Əlhəvicə şəhri ozod karde əməliyati bino beyku xəbəş doə.

Çimiku bənav həm İraği insonə həxon diyəkə təşkilat ım kişvəri Əlhəvicə şəhri ozod karde əməliyati barədə bə DAEŞ terroristiyə qrupi tərəfiku be pənohə cəmaəti bənə canqiyə sipər istifodə karde işarəş kardə be.

DAEŞ terroristiyə qrup həmmişə ğəyri hərbiyonku bənə insoniyə sipər istifodə kardedə ijən cəhd kardə ki hejo çı İraği hərbiyon əməliyaton vədə mane bıbu.

İraği Neynəva ostani ğərbədə bıə Təlleəfər şəhri ozod karde bə peştə ısət İraği hərbiyon ıştəni hozzo kardəşone ta Kərkuk ostani ğərbədə bıə Əlhəvicə şəhri həm DAEŞ terroristiyə qrupi işğaliku ozod bıkən.