İroni və Fransə prezidenton bə Tehron-Parisi miyono rabitəon inkişof və zumand karde təkidışon kardən.

İroni və Fransə prezidenton 2 qılə milləti mıştərəkə mənafe sahədə və həmmə dıl piyə baxşonədə bə Tehron-Parisi miyono rabitəon hevujəti iyən zumand karde təkidışon kardən.

İroni prezident Həsən Ruhani zinə ruji de Fransə prezident Emanoel Məkron telefoniyə rabitədə bə Tehron-Parisi miyono rabitəon təkidış kardə və votışe: de diğğət bə 2 qılə kişvəri miyono həmkarion sahədə veyə çokə zərfiyyəton xususi siyasi, mədəniyyət, iğtisodi ijən bə məntəğə vabəstə bıə məsələon, co baxşonədə həm Tehran de Parisi zumandə həmkarion bə ğəror ome tələb kardə.

İroni prezident ijən ətomiyə təvafuği çı məntəğə əmniyyət və zumandə həmkari amil zinəş be və votışe: de həmmə kişvəron rabitə bərğəror kardeyro İroni prinsip bə etimodi əsose iyən ğərbi kişvəron və İroni miyono əloğəon xatircəməkə i-nə muhimmə ğədəm ətomiyə təvafuğe.

Ruhani ətomiyə təvafuği zidd Amerkə nəzəri 7 qılə kişvəron miyono ım muğavilə əməl nıkardə misdağ zınəş be və votışe: dəvardə rujonədə İron veyni muhimmə ğəroron banki rabitə, valyuta və co iğtisodi məsələon baərədə vindəy ijən bo hər nəzəri ki Amerkə Mayə manqi 12ədə(22 Orbibeheşt) bıstəno, hozıətış bəbe.

Ruhani 2025-nə sori bə peştə ətomiyə təvafuği vəomey barədə bə beynəl xəlğiyə ğaydə əməl karde iyən muğavilə çərçivi bə kəno co məhdudiyəton ğəbul nıkarde işarəş kardə və  votışe: ətomiyə təvafuğ iyən de ım bəhonə co mıvzoon barədə hiç vaxti muzakirə ğubil nibəkamon.

Məkron həm 2 qılə milləti mıştərəkə mənafe səmtədə bə Tehron-Parisi miyoni rabitə və inkişof iyən zumandə əloğəon təkidış kardə və votışe: Avropa ittifoğ və məxsusən Fransə kamilən ətomiyə təvafuğiku himoyətış kardə və 100 fayiz ətomiyə təvafuğədə bəmande.

Fransə prezidenti əlovəş kardə: çəmə kişvər stabilə Miyonə Şərği tələb kardə və eteğadış heste ki ətomiyə təvafuğ bo məntəğədə bıə bıhranon həl kardeyro muhimmə modele ki bəbe oqətə bıbu və həmmə tərəfon bə ım təvafuğ pobənd bemandon.