Opek təşkilati rəis: İroni nati bə kəno noe ğeyri mımkune.
Nati sadirəkə kişvəron təşkilati yol vıjoriku İroni nati bə kəno noe ğeyri mımkun zınəş be və votışe: Opekədə ıştənbəsəti ni.
Muhəmməd Sanosi Barkindo zinə Tehronədə nat, qaz, nat kimiya iyən nati təmizəkə 24-nə beynəl xalğ nımoyişqo kənoədə ım təşkilati 2 qılə uzvon barədə ki pidəşon vıjorədə İrani vırə pur bıkən votışe: Opekədə ğəralon kalektiv forma mıəyyən bıdə iyən ım təşkilatədə ıştənbəsəti ni.
Əv təkidış karde: Opeki siyasət ome ki de koşınason məslehət karde iyən həmmə uzvon nəzəri vasitə nat vıjori barədə kalektiv ğəralon mıəyyən bıbu.
Barkindo nati barədə anti İron təhdidon iyən ehtımaliyə sanksiyaon vədə reaksiyaon çı nat vəzarətxonə iyən Opek təşkilati iclosədə votımonon dəvoniyəku xəbəş do.
Nati ixracatəkə kişvəron təşkilati yol votışe: anti İron sanksiyaon hukmən Opekədə təsironış bəbe iyən bənə İron, Livi və Vensoelaədə cari hadisəon nati vıjori ome vəzyəti mıəyyənəkəy.
İroni nat vəzir Bijən Namdar Zənqənə həm həminə nımoyişqo kənoədə Opek təşkilati bəzi uzvon tərəfo ıştən bə səti hərəkətonış ım təşkilati məhvəkə amil zınəş be və votışe: İron bəştə mənafe əsos Opekədə uzv bıə çən əqə bəzi uzvonn bo İroni təhdid kardero ım təşkilatədə səy-cəhd bıkon İron həm ciddi reaksiyaon nışo bədoy.
