Iştəniku mudafiə karde xoto İron bə hiç kəsi vabəstə ni.

İroni xarıci vəzir bə İroni bumi hərbi təchizaton təkidış karde.

Muhəmməd Cəvad Zərif zinə şəv Norveçədə votışe: İron bə deşmən təcavuz karde icozə ni bədoy.

İroni xarıci vəzir məntəğə bəzi ərəbə kişvəron çand milyard dollar silah hırye tənğidış karde və Amerkə iyən ğərbiyə kişvəron siyasəton bənə 2 dimə rəftor hisobış karde.

Əv votışe: ğərb və Amerkə i tərəf İroni bə muzakirə vanq kardən və co tərəf bə anti İron sanksiyaon dəvom dodən.

Muhəmməd Cəvad Zərif Avropa və İroni miyono maliyə məxsusə mexanizmi ko nıkarde tənğidış karde və votışe: Avropa şirkəton bəpe de İron ticarət karde xoto Amerkə maliyə vəzarətxonəku icozə beqəton ki ım çəvon zəifəti nışonəy.

Zərif bə məntəğə ədə anti terrorizm mubarizəonədə İroni rol işorəş ka və votışe: de terrorizm mubarizə barədə meydonədə şiə, sınni, ərəb, kırd ya fars muhimm ni və İron ım sahədə bə həmmə kəson koməkış karde.

Muhəmməd Cəvad Zərif ımruj de Norveçi i minə vəzir həm vindemonış karde.

İroni xarıci vəzir ıştə Avropa səfəri dəvomədə zinə şəv İsveçiku bə Norveç varid be.

Zərif zinə şəv qıləy Twitter mesajədə ıştə səfəri mısbət hisobış karde və votışe: de İsveçi i minə vəzir və məclesi yol ətomiyə muğavilə barədə muzakirəon vey çok bin.