Ərbəin şemon bə İmom Hüseyn(ə) məhəbbəti təcəssume.

Ərbəin şemon bə beynəlxalğə hərəkat peqardə. Çe dınyo muxtəlifə məntəğəono İmom Huseyn(ə) aşiğon ey ziyarət kardero bə Kərbəlo tərəf şemon kardedən. Im səfəri i hissə əvon piyodə şedən, şodoə har qəmədə ıştə məhbubi fikiri kəşedən, çey ruhi bə yod dənodən.

Ərbəin şemon jıqo qıley ibadəte ki, çe dınyo muxtəlifə məmləkətonku omə muxtəlifə zıvoninə milləton yəndı be zıvon, be qəp famedən, bə sə dəşedən, həx və ədaləti bərğəror bıe, de zulm və zulmkaron mubarizə barde roədə de yəndı bə vəhdət omedən.

Bənə har sornə ım sorən islami bədxahon bə Ərbəin şemoni mane bıe ro cəhd nişon dodən, xərobkorəti karde pidəşone. İraği “Həşt-Şəbi” əməliyyat ğərarqohi komandir, qeneral Əli əl-Həmədani bə media məlumat doəşe ki, ıştə təşkilati 40 həzo uzv bə Ərbəin zəvvaron xidmət nişon doe və çəvon əmniyyəti təmin karde ro səfərbər kardəşe. Ey əlavən votəşe ki, haliyədə əvon ıştə əmniyyətə və xidmətə ğıvvon Babil əyalətiku tosə Nəçəfə xıli məntəğəonədə, həmən Kərbəlo şəhər və çey ətrofədə dəğandəşone.

“Maide.az” bə İQNA aqentiyyəti istinadən xəbə doəşe ki, ım sor çe dınyo 21 məmləkətiku omə 10 həzo 700 mokib və xidmətə qrup çe Ərbəini  zəvvaron ğolloğədə bəmande. “Çe İraği iyən dınyo Ərbəin heyət və mokibon idarə” rəis Riyaz Nemət Salman`i bə muxbiron ımən votəşe ki, çəvon idarə həmkaron bo zəvvaron piyodə şemoni, istirahət və ziyarət karde ro xeyli zəhmət kəşəşone. Bo har qıley zəvvarə qrupi  bə İmom Huseyn (ə) hərəm daxil bıə vaxt muəyyən kardəşone, çe navo əvon bə ğeyd səşone ki, zəvvaron de mutəşəkkil qıley nizam-intizami əzadarəti içra karde imkanədə bıbon.

Imsornə Ərbəinə ruj de miladi təğvimi oktyabrə manqi 19-ədə bəbe.