Fransə rujnomədə bıə tojə anti islam hərəkəton məhkum karde xoto İroni şəhronədə eteroz aksiyaon.
Zinə və ımrujə İroni millət muxtəlif şəhronədə de eteroz aksiya dəvoniye Fransə Şarli Hebdo rujnomə bə İslam Peyğombər(s) ihonəti məhkum kardışone.
Qilan ostani kənoədə, Ğomi dini tələbəon iyən muxtəlif cəmaəton zinə ım şərədə bıə İroni inğilobi təsisəkə mərhum İmom Xomeyni kəvədə ıştə eteraz aksiya dəvonişone.
Məşhəd şəhrədə həm bənə jığonə eterazon əv həm Fransədə bə islam dini peyğombər(s) bıə ihonət amizə rəftoron məhkum karde və həzrəti karikatori ijən çap kardeyku ıştə nifrəti nışo doe xoto bərpo be.
Tojədən İsviçədə bıə anti islam radikalə qrupon tojə beğanunə aksiyaədə i cild Kərimə Ğron çı radikaliston tərəfo sutə bəy.
Fransə Şarli Hebdo nomo rujnomə həm dəvardə haftə qıləy ihonət amizə ko vasitə bə İslami əziz qiromiyə Peyğombəri zidd Danimarkaədə miladi 2005-ə sori muntəşir bıə karikatoron ijən çapış karde ki dınyo mısılmonon norohəti iyən əsəboniyəti bois bıə.
Fransə Şarli Hebdo rujnomə siyasət iyən koon sabiğədə jığo bə mısılmonon ihonət və be ehtıroməti karde mətləbon pure.
