Bə Trampi əleyh Amerkədə etıroz aksiyaon ijən dəvomış heste.

Çı Amerika Niyoyork, Çikaqo, Riçmond şəhronədə cəmaəti etıraz aksiyaon ijən dəvomış heste.

Cəmaət Trampi tojə ğərori barədə bə Amerika kişvər miqranton səfəri ğədəğən karde xoto etırazışon heste.

Bə İrib raporti əsos etıraz əkəyon ıştə şuaron, pılakarton və boydeğonədə bə Donald Trampi tojə ğəroron etıraz və ıştə norozi mande elanışon kardə.

Amerika co şəhronədə həm çan həzu nəfər cəmaət bə həminə ğəroron ijən bə Amerika kişvər mıhociron və miqranton səfəri ğədeğən elan karde xoto airportonədə etırazinə mitinqon dəvoitəşone.

Amerika tojə prezident Donald Tramp çan ruj çimiku bənav qıləy cəncoliyə ğərori vasitə elanış karde ki çandə islamiyə kişvəron, İrağ, İron, Sudan, Somali, livia, Suriyə və Yəməniku miqranton və mıhociron səfər bə Amerika məhdod bəbe.

Dınyo umumiyə iştimaiyət və muxtəlifə kişvəronku rəsmion çı Trampi həminə ğərori qıləy İrağçiyə ğəror və de rasizm siyasəton bərobər hisob kardəşone.

Tramp çımiku bə nav və ıştə vıjnemoni kompaniyədə çand kərə votəş be: əqər prezident bıbu, bə Amerkə mısılmonon səfər karde ğədəğən bəkay ijən Amerika və Meksika sərhədədə parçin bəkəşe.

Bə Vaşinqtonpost jurnali raporti əsos, 60 fayiz çı Amerika şəhrvandonku çın kişvəri prezidenti siyasət və tojə ğərori pidəşon ni.