Şəmxani: bə zumand, stabil iyən mıtəbərə təvafuği rəseyro İron bə sanksiyaon peqətey muzakirəon varid bıə.
İron İslam Respublika milli əmniyyəti ali şura sərkatib de Ğətəri xarıci koon vəziri vindemonədə təkidış karde: bə zumand, stabil iyən mıtəbərə təvafuğ rəseyro İron bə sanksiyaon peqətey muzakirəon varid bıə.
Ğətəri xarıci koon vəzir, Muhəmməd İbne Əbdul Rəhman Ale Sani ki bə Tehron səfərış kardə be, zinə de İron İslam Respublika milli əmniyyəti ali şura sərkatib vitse-admiral Əli Şəmxani vindemonış karde iyən məntəğə, 2 tərəfiyə məsələon və siyasi və əmniyyəti oxonə təhəvulaton barədə votımonış karde.
Bə İron İslam Respublika milli əmniyyəti ali şura dəbirxonə raporti əsos, ım vindemonədə Şəmxani votışe: hamsuyəon barədə, İroni daimə siyasət, stratejik iyən həmmə tərəfiyə rabitəon bə inkişof rosniye iyən de çokə hamsuyəti bə icoe.
İron İslam Respublika milli əmniyyəti ali şura sərkatib məntəğədə noəmni icod kardeyədə terrorist iyən siyonistonku bənə 2 qılə vey muhimmə amil yodış karde iyən əlovəş do: har koalisiya ki de sionist rejim bə ico bıbu, hətto əqə ğəyre əmniyyəti və ğəyre hərbi bıbu, məntəğə əmniyyəti təhdid bəkarde.
Şəmxani ijən əlovəş do: İron İslam Respublika həmişə bə cəmi əmniyyət iyən kişvəron ərazi oqətey bənə qıləy daimə stratejik təkidış karde.
İron İslam Respublika milli əmniyyəti ali şura sərkatib atomiyə sazışi muzakirəonədə, İroni metod bə stabil, mıtəbər iyən zumandə təvafuğ rəseye iyən əlovəş do: bə İroni ələyh zalımonə sanksiyaon bəpe jəqo peqətə bıbu ki həmmə kişvəron karde bəznen de dıroz mıddətə mənafe oqətey İronədə vey hoston bə sərmoyə noey məşğul bıbun.
Im vindemonədə, Ğətəri xarıci koon vəzir ıştə səfəriku bə İron vey rozi bey nışoş do iyən maneon peqəteyro bə məntəğə votımonon və bə kişvəron miyono 2 və çand tərəfə rabitəon icod kardey təkidış karde.
