Paşiniyan bə İslomi İnğilobi Yolə Rəhbər və İron İslom Respublika prezdent təbrikə mesajış vığandə

Ermənistoni iminnə vəzir, Fitrə idi mənosibəti bə İslomi İnğilobi Yolə Rəhbər və İron İslom Respublika Prezdent təbrik votışe.

Bə İslomi İnğilobi Yolə Rəhbəri təşkiloti elani əsos, Şənbə Şəvvalə manqi 1minnə ruj iyən Fitrə id be.

İslomi mədəniyətədə Şəvvalə manqi iminnə ruj, bənə Fitrə id və bəştə fitrət oqardey ruji şo id təyin bıə.

Həminə cəhətədə və bə Fars aqentiyəti raporti əsos, Yekşəmbə rujədə, Ermənistoni iminnə vəzir, Nikol Paşiniyan qıləy mesajədə, Bə İslomi İnğilobi Yolə Rəhbər Həzrəte Ayətullah Xamenei və İron İslom Respublika prezident, Seyd İbreym Rəyisi Fitrə İdi mınosibəti təbrik votışe.

Bə İroni İslomi Yolə rəhbəri xətob, Paşiniyani mesajədə omə: Fitrə idi dəme mınosibət ki rujə qətey və nəfsi təhzibi oxonə simvole bə şımə və İroni İslomi Respublika millət təbrik votedəm. Ermənistoni millət və devlət, İron və Ermənistoni qamə rabitəon veyə muhimm zıneydə.

Ermənistoni iminnə vəziri mesajədə ijən omə: umidımon heste ki bə stabilə həmkoəti və siyasi irodə xoto, Erməniston, İron və məntəğə əmniyyəti cəhəto, 2 qılə kişvəri həmkoətion hevujəti şoyd bıbəmon və de ım fırsəton istifodə kardey İroni millətiro stabilə sulh və tojə muvəffəğiyəton urzo kardedəmon.