Pars Today

İroni prezident təkidış kardə ki ətomiyə təvafuğ qıləy 2 tərəfiyə mığovilə ni ijən har kişvər ki ətomiyə təvafuği rioyət nıkardero ğəroli binokə ıştə ğanuniyə əhd-peymonon rioyət nıkarde kənoədə bə təcrid mande siyasəton intixabış kardə.

İ bıə milləton təşkilati umumiyə icma 72-nə iclosədə nıtğ karde xoto İroni prezidenti bə Niyoyork səfər karde oxoədə Həsən Ruhani qıləy umumiyə xəbəriyə iclosədə votışe: Amerkə millət iyən Avropavıjə kişvəron İron və 5+1 qrupi miyono ətomiyə təvafuğiku çı Amerkə dıvləti xaric bey himayədor nin.

İroni prezident bə Amerkə prezidenti cahilanə və be əsos sıxənon ijən i bıə milləton təşkilati umumiyə icmaədə bə İroni əleyh bəyon bıə ittihamon işorəş kardə ijən əlovəş karde ki: Tramp bəbe çı İroni millətiku uzr tələb bıkə.

Ruhani ijən Ruhinqiyavıjə mısılmonon ğətliam və etnosid siyasəton barədə çı Myanma hərbion iyən radikalistə buddiston cinoyəton barədə təsdiğış kardə: i bıə milləton təşkilat və əmniyyət şura bəbe rə ım mıvzo barədə əməliyə koon əncom bıdən.

İroni prezident Yəməni bıhrani barədə həm votışe: Yəmənıjon çı Ərəbistoni vəhşiyə huccumi jentonədə bə vey xətərnokə noxəşətion dıço bıən.

Ağaye Ruhani bə İroni himoyəon ijən İrağ, Suriyə və Livani millət və mığovimətiyə qrupon peştədə mande xoto siyasəton işorəş kardə və votışe: de terrorizm mubarizə barədəro İron əmələn sabitış kardə ki vey ciddiyə koon əncom dodə.

İroni prezident əlovəş kardə: İron bə Suriyə, İrağ və Livan iyən co kişvəron komək kardedə ta ıştə kişvərədə əmniyyəti icod bıkən.