İronıjə ğovmon(xalğon) miyono Nəvuzə İd(2)

İronıjə ğovmon(xalğon) miyono Nəvuzə İd(2)

İroni Azərbayacani məxloği  Nəvuzə idi vey muhimmə ayinonku qıləyni ki,ısətən həm çəvrə xıyzonon veyniyədə ım oqətey bıə,bə şu şıə kinə kə çı pıə kəyku xorək vığandeye.”bayram payı” çı inəon tərəfiku bə şu şıə kinon idə təbriki iborəte ki,nəinki,ım çı kinəon izdivaci sıftənə soronədə,bəlkəm çanədə ki,pı-mo jimonədə hestin,bə ın adət-ənənə əməl kardedən.

Sori təhvili iruj bənav tırkə eyli və toyfə jenon de ordə,ruyən iyən xımo qıləy məxsusə həlva hozzı kardedən və əy de sori oxonə ruji nomi boştə mardə kəson xeyrat iyən ehson kardedən və bə ın ruji “ərəfə” votedən.ehanə ğəbıston ya qıləy imomzodə çəvon ətrofədə mevcud bıbu,bə həmonə vırə şedən və əyo fatihə-xey doydən.əvon bo idə şəvi səy kardedən bənə kaqi ya pəsə balə qujdiku hozzı kardə bıə qıləy çokə şanqonə hozzıkon.idə şəvi bəbe həmməkəs ıştə kədə bıbu və əgər səfədə həm bıbon cəhd kardedən ki,rə bəştə kə oqardon.çəvon jıqo etığodışon heste ki,nuyə sori iminə şəvi bəbe ıştə kədə və ıştə ocağədə qıləy komilə hardemonış bıbu ta omə sori həm jəqo əy dəvom bıdo.əşirət iyən kuçəkə toyfəon idə rujonədə ıştə çadıron de xolçə, kilim iyən pəsi pustiku hozzı kardə bıə ranqinə çi dərostedən və ıştə çadıron pojə səpe ranqinə çiyon ehaştdedən.əvon bə pəsi bədəmi i baxşi ranq jeydən,bəştə hırdənon dasti xeynə jedən və nuyə olət bəçəvon tan kardedən.Nəvuzə idi vaxti nəvemon iyən bə iyande kə şıey-omey çı nimeyjə bənav bino bedə və əvon iminə kərə bəştə sipyə rişon osə ğandedən iyən deəvon vindemon kardedən və təğribən həmməkəs iqlə vırədə cəm bedən.çın vindemoni bəpeştə əvon bəştə nezə çaduron osə ğandey bino kardedən.de iyande vindemon iyən təbriki bədiqə de “yuxa” nomo bıə şinə nuni,bıştə qandım,viz,hışk kardə bıə xımo,incil,kişmiş,şini iyən kekson bəçəvon pişvaz beşedən və bə iyande hədiyyəon doydən.əvon adətən kinə sıey iyən vəyə kardey mərosimon həm bın Nəvuzə idi ərəfədə əncom doydən.

İroni tırkmənə millət həmçinin bənə co ironıjə xalğon de mıxtəlifə məxsuə mərosimon bə Nəvuzə idi pişvaz beşedən iyən ım ruji id qətedən.tırkmənon miyono qıləy məşhurə zərbul-misol mevcude ki,votedən:”Nəvuzə id çı nuyə sori dəmeku xəbə doydə.ım zərbul-misol çı tırkmənon miyono Nəvuzə idi barzə əhəmiyyəti nışon doydə. İsfənd manqədə bənə səbzi(səməni) hozzı kardey,kə-bə təmiz kardey,xolçəon şışte,bə kə tojə ranq jıey,nuyə olət hıriye və bo tojə sori şini, bırz iyən ruyən hozzı kardey çəvon miyono adəte.