Huseyniyə Ərbəyin(Cabiri rəvoyət).
Bə Huseyniyə Ərbəyini aid bərnomə.
Cabir ibn Əbdullah Ənsari bə Kərbəlo omə.qıləy merd ki,çəşonış vindedəni,əmmo ruji çı pəyğombər(s)-i reçinə sima,çı Əli(ə)-i əzəmət və heybət,İmom Həsən(ə)-i dılojkardə surət iyən çı İmom Huseyn(ə)-i nəz nufuz və oroməti və peşo çı İmom Zeynulabidin(ə)-i və hətto çı İmom Bağır-Əlulum(ə)-i vavriski doə simaş həm vindəşbe.qıləy merd ki,ıştə cıvonəti rujoqorədə çı pəyğombər(s)-i xotirəon nıvışteydəbe və çı peyğombəri(s) bədiqə çandə soron de ə həzrəti əhli-beyti(ə) bə ico be,ısət deştə nəcib iyən şərifə şoqirdi Ətiyyə O`fi bə ico bə Kərbəlo omə.
Səfə manqi vistminə ruje.Cabir Furati ruyədə ğosl sıeyku oqardeydə.əv qıləy dıroz iyən sipiyə şəyış bəştə tan kardə və çı Sudi ətrış bəştə bədəmi jıəşe ki,çəy nəsim iyən bu bə Kərbəlo səhro pevolo bedə.Cabir qədə-qədə ğədəm şoydə və har ğədəmədə zikr kardedə.əv bə qıləy məzari nez bıə holədəy ki,sivı həşt ruj çımi bənav de İmom Səccod(ə)-i anqıştəbınə çəy sape jıqo kəlməon həkk bıə:haza ğəbru Huseyn ibn Əli.əlləzi ğətələhu ətşana! ım çı Huseyn ibn Əli ğəbe ki,təşnə ləb bə şəhodət rəse.sefi bu bə həmmə tərəf pevolo bedə.Cabir iyən Ətiyyə bə ğətlqohi çolə tərəf rəsedəbin.həmonə vırə ki,çı insonon həmməysə mahbub iyənb azizə qılə iyo çəyu baədəm poə-poə bıəbe iyən çəy sə çəy bədəmiku co bıəbe.
Cabir Ətiyyəkuş piyedə ta çəy dasti bəsə İmom Huseyn(ə)-i məzorisə bıno.Cabiri amon larzedə iyən çəy çəşonku ars çəy sipiyə rişış silə kardə və hətto bəsə çəy sipiyə olətonsə rubedə.Cabiri ıştə dimi kukəonış bə məzori dəsyuşe və fəryodış je:"Allahu Əkbər,Allahu Əkbər,Allahu Əkbər" və peşo bihuş be bəsə zəminisə eqıniye.Ətiyyə bə Cabiri sima iyən dimi ovış peşande və Kərbəlo matəmədə ğəmqin bıə ım piyə merd bəştə ome.çən,ijən se kərə vanqış je:"ha Huseyna ha! Ha Huseyn ha! Ha Huseyn ha!". Cabiri hiç qıləy cəvob nıstəney bəpeştə nolə jıə holədə voteşe:"Aya dust bəştə dusti cəvob nibədoe?.çən,peşo ıştə-bəştə cəvobış doe:çokonə tı cəvob doey bəzıneş ki,ıştə bədəmi deştı sə miyono çandə fərsəx iyən kilometr fosilə mevcude".ha Huseyn ha! şoydəti kardedəm ki,tı çı oxonə pəyğombəri fərzəndiş.tı çı "Əshabi-Kisə" pencminə şəxs iyən çı Fatimeyi-Zəhro(s) fərzəndiş.tı Xıdo-Rəsuli(s) dastiku xorək və tı çı imoninə sinəku şıt hardə.qıləy hərəbaxtə jimonı kardə iyən şərofətinə surətədə mardiş.
Peşo Cabir bəsə səpoysə əhışte.səhroş bu karde və hakərə bə qıləy əshobi səlom doydəbe.səlom bıbu bə Əbbosi,səlom bə Əli Əkbəri,səlom bə Ğasımi,səlom bə Əbdullah Rəzii,səlom bə Həbibi,səlom bə Muslimi iyən səlom bıbu bə İmom Huseyni(ə) co qılə bəfodorə əshobi.peşo deştə anqıştə bəştə ğeyrətin iyən ğəribə movla məzori işorəş karde və voteşe:"ğəssəm bıbu bə kəsi ki,Muhəmmədış bo pəyğombəri vıjniyəşe,əmə deşmə əncom doə koonəd şərikimon.yəni şımə şəhodət,ıştə coniku dəvardeyədə iyən fədokorətiyədə şərikimon.Ətiyyə çı çoçinəıti iyən heyrəti dılədə ğərğ bıəbe.əve Cabiriku dəparseşe ki,çokonə mumkine əmə hiç qıləy şımşi bə dast penı qətə iyən canq nıkardə,ştə coni nıdoə və bəştə xuni ğəlton nıbə holədə de əvon bə icomon? cabiri voteşe: Ətiyyə! mı ıştə mahbub Xıdo-Rəsuliku(s) məseme ki.hamyeşe:"Mən əhəbbə ğəovmən huşirə məəhum......hakəs iqlə dastəş bıpyo,deəvone və qıləy dastə koon ğəbulko,çəvon koonədə deəvon şərik iyən bə icoe.ğəssəm bıbu bə peyğombəri həxədə vıjniyə kəsi,çımı iyən çımı yaro-yavəron niyyət həmonə çı Huseyn(ə) iyən çəy royədə ıştə coni doə əshobi niyyət be".
