944-ə hissə-Muhəmmədi surə -18-20 şərifə ayəon

944-ə hissə

فَهَلْ یَنظُرُونَ إِلَّا السَّاعَةَ أَن تَأْتِیَهُم بَغْتَةً فَقَدْ جَاءَ أَشْرَاطُهَا  فَأَنَّى لَهُمْ إِذَا جَاءَتْهُمْ ذِکْرَاهُمْ(18)

Çən,aya çəvon ğərəz ımi intizorışon heste ki,ğıyomət ğəflətən bəçəvon soyəx bome,qıləy holədə ki, (ısət həm)çəy nışonəon omə.çən,(ğıyomət)bəçəvon soyəx omeyədə,çəvon mutəzəkkir bıey(pand qətey) boəvon çı foydəş bəbe?

Navnə proqramədə bə kəson işorə kardey be ki,əvon deştə inodkorəti ruhiyyə iyən de təhğiramizə toni de İlahi peyğombəron rəftor kardedəbin.ın ayə miadi kali munkiron barədəy ki,votedən:çanədə əmə ğıyomətımon deştə çəşi vindəmon ni,bəy imon nibəvardemon.qıləy holədə ki,bo ğıyoməti bə əməl omero ruşinə dəlilon mevcude.

Əgər əvon çı həxı ğəbul kardey dumo bıbon,ğıyoməti vindey bənav,de ağli dəlilon bəy imon bəvardeyn və ısət həm imon vardedənin,ğıyoməti mışohidə kardə zəmonədə həni çəvon imon vardey boçəvon holi hiç qıləy foydəş nibəbe.dırıst bənə qıləy noxəşə insoni ki,doxtor çəy noxəşəti əlomətonış mıəyyən kardəşe və boçəy mıolicəro nusxəş nıvıştə,əmmo noxəş votedə:çanədə az maqım vindəmni,ğəbul nibəkardem ki,az noxəşim və çımə bə davo-damoni qıləy ehtiyocim ni.ruşine ki,həni bə zəmon çı davo-damoni hiç qıləy foydəş nibəbe və boəvon fəğət peşmonəti bəmande.çın ayəku omutedəmon:

1-miodi munkir və kofiron bəştə inodkorəti xoto,çı tobə iyən oqardemoni fırsətiku oko doydənin və həyğətədə İlahi mehləti bə hədər doydən.

2-ğıyoməti bə əməl omey dəlil və əloməton ziyode.əmmo bo əkəsi ki,qıləy məsə quş iyən həxı dumo bıə dılış bıbu.

فَاعْلَمْ أَنَّهُ لَا إِلَهَ إِلَّا اللَّهُ وَاسْتَغْفِرْ لِذَنبِکَ وَلِلْمُؤْمِنِینَ وَالْمُؤْمِنَاتِ  وَاللَّهُ یَعْلَمُ مُتَقَلَّبَکُمْ وَمَثْوَاکُمْ(19)

Bızın ki,ğərəz Xıdo hiç qıləy mə`bud ni və boştə və bo imoninə merdon iyən jenon qıno məğfırət tələbkə və Xıdo şımə şıey-omey iyən oromətiku xəbədoye.

Çı kofiron inodkorəti mığobilədə,ın ayə bə Peyğombəre-Əkrəmi(s) xitob kardə holədə hamyedə:şımə həm ıştə royədə ğoym və poydor bımandənən və bızınən ki,ğərəz Vohidə Xıdo irodə bın aləmədə coqlə ğudrəti foydəş ni və hiçkəs Xıdovəndi ociz kardey nibəzıne.çən,həmmə holonədə bəpe bəy pənoh bobənən,bəy təvəkkulkənən iyən çı deşmınon rəğəmi ziyodətiku mətarsənən.

Ayə dəvomədə bə ın nuktə işorə kardedə ki,imoni əhl bəpe bə İlahi təğva rioyətkon və əgər həm qıləy vırədə bə fırsemon iyən ğusuron dıço bin,bəvədə Xıdovəndiku məğfırət tələbkon.

Peyğombəre-Əkrəm(s) həmçinin həm boştə və həmən bo muminon əfv və baxşeş tələb kardedə.ruşine ki,peyğombəron çı qınoku pok bıən və peyğombəri istiğforiku murad və məğsəd,çı qınoku baxşeşi tələb kardey ni,bəlkəm çı aləmon pərvərdıqori mığobilədə xuzu iyən xuşu ruhiyyə bəyon kardedə ki,inson hejo ıştəni İlahi dərqoyədə mığəssır zıneydə.zira risoləti ko,qıləy sanqinə vəzifə və məsuliyyəte ki,Xıdovəndi tərəfiku çı peyğombəron duşisə noey bıə.əvon bəpe dayima hisskon ki,ıştə məsuliyyəti çoko lozıme jəqo həm bəpe bə vırə bırosnon ta çı mıcohidətonku dast nıkəşon və ıştə kardə koonku rozi və ğane nıbon.

Boçımi əsos Kərimə-Ğıronədə nəyinki,İslomi-Peyğombəri xısusədə,bəlkəm vəynə peyğombəron həxədə həm Xıdovəndiku baxşeş tələb kardeyku bəhs kardey bıə.çın ayəku omutedəmon:

1-çəmə həmmə rəftor iyən sıxanon bəpe bə tohid iyən Vohidə Xıdo pərəstışi əsos bıbu,əmə bəpe bə bəşəri puçə ğudrəton təkyə məkəmon və çəvonku mətarsəmon.

2-imoninə merd və jenon bə Xıdo-Rəsuli(s) istiğfori şomil beydən və ə həzrət milləti hidoyət kardeysə əlovə,boçəvon rufi təhorət iyən pokətiro həm Xıdovəndiku komək tələb kardedə.

3-peyğombəron həm bənə sayir milləti çı bəşəri cinsikuon və bə insoni şərayiton məhdudin.liza əvon həm boştə məhdudiyyəton cubron kardero,bə Xıdovəndi lutfi etiyocişon heste.

وَیَقُولُ الَّذِینَ آمَنُوا لَوْلَا نُزِّلَتْ سُورَةٌ  فَإِذَا أُنزِلَتْ سُورَةٌ مُّحْکَمَةٌ وَذُکِرَ فِیهَا الْقِتَالُ رَأَیْتَ الَّذِینَ فِی قُلُوبِهِم مَّرَضٌ یَنظُرُونَ إِلَیْکَ نَظَرَ الْمَغْشِیِّ عَلَیْهِ مِنَ الْمَوْتِ  فَأَوْلَى لَهُمْ(20)

Və əkəson ki,imon vardəşone,votedən:çıro (bo cihodiro)qıləy surə nozil beydəni?əmmo qıləy mehkəm iyən ruşinə surə ki,bəvədə canqiku qıləy nom kəşə bıə,nozil beydə,noxəşədılon vindedəş ki,bətı erəxeydən.bənə əkəsi diyə kardey ki,maqi(tarsiku) behuş bıə.çən,həmonə maq bəvon vey loyığe.

In ayə bə İslomi sıftənə soronədə bıə mısılmonon yavə şərayiti işorə kardedə və hamyedə:çı deşmınon təzyiğ jıqo be ki,muminon çı peyğombəriku(s) deəvon canq iyən muharibə kardey izocə tələb kardedəbin və votedəbin:boçi ayəon nozil beydəni ki,bəvon canqi icozə doey bıbu?əmmo çoko ki,kali surəon nozil beydəbe və de deşmınon muborizə bardey əmr kardedəbe,çəvonku idastə ki,çı mubarizə iyən cihodi iddio kardedəbin,bə dumo pekıreydəbin və çəvon çəşon bə tarsi xoto çı hərəkətiku mandedəbe.

Bə həyğiyə muminon əks ki,de tosə ıştə coni oxonə nəfəsi cihod kardedəbin və bo Xıdo royədə şəhodət iyən confəşonəti hozzı bin,əmmo noxəşədılə mınofiğon hənuz canq bino nıbe,jıqo əvon çı vəhşət iyən iztırobi dılədə bin ki,jıqo bızın əvon ğəbze-ruf beydən və çəvon conın çəvon bədəniku sıey beydə.çın ayəku omutedəmon:

1-mumkine veyə fərdon iddio bıkon,əmmo əməli zəmon iyən canqi meydonədə,muminon çı mınofiğonku co və məlum beydən.

2-harçənd İslomə din rəhməti dine.demiyən ijən de sıtəmkor iyən zolımon cihod iyən mıborizəku bəhs kardedə və deəvon mıborizə bardey fərmoni doydə.

3-cihodiku tars iyən canqi meydoniku fərol kardey ,imoni sıstəti iyən daxili nifoği nışonəy.