Təkfiri cərəyonon
Təkfiri cərəyonon
Əvon həmçinin Hicri-Ğəməri 1343-ə sori şəvvolə manqədə de Bəği ğəbıstonədə bıə imomon ğəbon təxrib kardey,həmonə pok və mutəhhərə ğəbonədə bıə nəfis iyən erjinə əşyaonışon həmmə ğarətışon karde və həzrəte Həmzə(ə)-i ğəb iyən Uhudi canqi qırd şəhidon ğəbonışon de zəmini həmo kardeşone və çı pəyğombər(s)-i pı Əbdullah(ə) iyən inə Amənə(ə) mərğəd və co ğəbonışon həm xərob kardeşone noşone.təəssıbinə vəhhabiyon həmonə sori bə Kərbəlaye-Muəlla həm həmləşon karde və çı İmom Huseyn(ə)-i mıborəkə zərihişon voloşon karde bekaredeşone və çə həzrəti pokə hərəmədə bıə nəfis iyən ğeymətinə əşyaon ki,çəvon veyni çı soltanon tərəfiku doə bıə vey boho ğeymətinə hədiyyəon bin,-həmməşon ğarət karde və bə 7000 nezi alim,tələbə,seydon iyən co insononışon ğətl-amışon karde,kışte. Im qıləy cinoyəte ki,ım ruj həm çə sələfon xələfon yəni təkfiri terroristə vəhhabiyon ısət Suriyə, İrağ, Liviya,Tunis iyən co islomi kişvəronədə bın çandə dəvardə soron ın koon dəvom doydən və de İslomi dini yolə rəhbəron,əshob iyən çəvon nəvoon pokə ğəbi volo kardey koy məşğulin.
Vəhhabiyon bə Kərimə-Ğıroni mutəşabeh ayəon istinod kardə iyən rəvoyətonku səhf sərəsə holədə ki, joqo sərəsn ki,quya əvon bə tohidi prinsipon dastışon pəydu kardə,çı ğəbon sape bina soxte şırk iyən bidət zıneydən və ilahi ovliyaon qunbəd iyən barqahon təxrib kardedən.əvon bə qıləy hədisi istiniod kardə holədə çı ğəbon sape bina soxtey şırk hisob kardedən. çoko ki,İbn Teymiyyə ıştə “Minhacus-sunnə” kitobədə voteydə ya çəy şoqird İbn Ğəyyum və ya Şovkani “Niylul-Ovtar”-ədə voteydə ki,çı ğəbon sape bina iyən qombəd soxtey bənə(Lat və Uzza) bıti soxteye və ın həm bə kufri boyis bedə.qıləy rəvoyət ki, vəhhabiyon bəy istinod kardedən,sənəd cəhəto cə`li iyən pesoxtə bıə və çın hədisi rəvoyət umdətən de tədlisi yəni hədisi sənədi zəyifəti puşniye vositə məşhurin və saniyən ın rəvoyət dəloləti nəzəku həm zəyife və çı vəhhabiyon iddio isbot kardedəni.çıro ki,çəvon nəzəku çı ğəbon sape bina soxtey hərom iyən ğombəd iyən ğəbi volo kardey vocibe.əmmo ın rəvoyət bəçəvon iddio hiç qıləy dəlolətış ni.İbn teymiyyə iyən bəy tabe bıəkəson ın iddio ki,ğəbi sape bina soxtey şırk iyən hərome,qıləy koye ki,bo mıdofiyəro hiç qıləy ğabiliyyətış ni.əvon votedən:şiəyon bəsə peyğombəron,imomon,imomzodəon iyən alimon ğəbon sape dıjdə bina iyən qombədon soxtən və bə ın vıron şedən,çəvon zərihon pusə kardedən və çəvon ğəbon mığobilədə tə`zim kardedən və de bəme məşğul bedən ki,ın koon bə Xıdo şırke və ım çı Lato-Uzza pərəstışisə həm vey dıjde.bə şiə etığodon ağndə bıə çın dıjdə iftiro cəvobədə bəpe bıvoti:islomə dinədə bə mardəkəson cənozə mardey bədiqə qıləy məxsusə ehtıromış heste.çoko ki,mığədddəsə şəryəti soybi hamyəşe:bəpe bə cənozə ğosl doey bıbu,hənut bıbu,əv kəfən kardey bıbu,bəy cənozə nımoji handey bıbu,çəy cənozə təşyi kardey bıbu,boəy əzodorəti kardey bıbu iyən əv bəpe dəfn kardey bıbu. beşəkk, bəsə cokəsonsə bə dini ovliyaon iyən imomzodəon ğəbi ziyodə ehtırom noey, ağli cəhəto ğəbul bıənine. ısət ki,ehanə çı vəhhabiyon məğsəd və mənzur şiəyonin ki,bə mığəddəsə vıron pənohışon bardə və vahidə Xıdo pərəstışi əvəzi ,ın ğəbon pərəstış kardedən və Xıdo zikriku ğafilin,yəğınən jıqo qıləy ko şırke və qırd mısılmınon bəpe deəvon mıborizə bıbardon, əmmo həlbəttə ki,jıqo qıləy çi mevcud ni,bəlkəm ım qıləy duyə iftiroeye ki,İbn teymiyyə,ibn ğəyyum iyən co vəhhabi mıftiyon kurkuronə surətədə ımi bə zıvon vardedən.
