Təkfiri cərəyonon
Təkfiri cərəyonon
Amerkə milodi 2003-ə sori İraği işğal kardey bəpeştə bıə hədəfon bə vırə nırəse.irağədə vıjnemonon bərpo be və bın kişvərədə devlət təşkil be ki,ım həm bə Ali-Səud rejimi norohətçiyon boyis be.İrağədə qıləy demokratik nizomi təşkil bıey iyən de İron İslom Respublikə nezə rabitəon bərpo bıey,İrağədə çı Ali-Səud rejimi nufuzi kam bıey mənoədə be.Səudiyyə Ərəbıston ıştə qırd sərmoyəş noe ta İraği devləti stabiləti bəyənde bıjəno və bın kişvərədə qıləy xaos icodko.əve,əvon bın cəhətədə DAİŞ terroristə təkfiri iyən vəhhabi cərəyononışon bə əməl varde və əvonışon har cəhəti himoyə karde.”İrağ iyən Şami devləti təşkilot” ki,de DAİŞ terroristə dastə nomi məşhur be,2003-ə milodi sori de Amerkə bə ın kişvəri həmlə zəmonədə və de kali Əlğaydə bə İrağ vitəuzvonku və de əslış İordaniyəvıj bıə Əbu Musəb Zərğavi rəhbərəti vositə təşkil be.Zərğavi bə İrağ omey bəpeşt,tohid iyən cihodi cəmaatış təsis karde və bə Əlğaydə terror təşkiloti rəyis Usamə ben Ladeni beyətış karde.Zərğavi İrağədə “Mıcohidon Şurə Məclisış” təşkil kardeşe və de İraği ğəbiləon ittofoğış təşkil karde ki,çın ittifoğı nom həm “həlful-mutəyyibin ” (pokon mığovilə) nomış hestebe.Əbu Musəb Zərğavi 2006-ə milodi sori kıştey be və Əbu Umər Bəğdadi çəy canişin be.Əbu Umər Bəğdadi həm 2010-ə milodi sori de İraği hərbi ğıvvon vositə kıştey be və Əbu Bəkr Bəğdadi çəy vırədə canişin be.de Amerkə,deçəy Avropəvıjə iyən bənə Tırkiyə,Ərəbıston və Ğətəri bıə reqinoal mıttəfiğon vositə 2011-ə milodi sori Suriyədə behron soxtey bəpeştə,Cəbhətun-Nusrə terroristə dastə ıştənış İrağədə bıə çoko bəbeoteyn islomi devləti dəvomış elon karde və 2013-ə milodi sori ın təşkilot ıştə nomış de İrağ iyən Şamədə İslomi devlət (DAİŞ)nomi əvəzış karde ta kardey bızınon har dıqlə kişvərədə terroristə əməliyyaton əncom bıdon.Bəğdadi iddioş karde ki,Cəbhətun-Nusra bəpe çı DAİŞ-i nəzorəti jiyədə fəaliyyətko ki,Cəbhətun-Nusra uzvon ın pişnahadışon ğəbul nıkarde.oxoyədə çın dıqlə terroristə dastəon miyono canq bino be ki,bın canqədə har dıqlə tərəfi veyə uzvonku bə həlokət rəsin.çın ixtilofon zəmonədə Əlğaydə rəhbər Əymən-əl-Zəvahiri de qıləy audiyo sədo vositə elonış karde ki, çı Colani İrağ və Şam devləti volo bıey təsdığ kardedə və Colani Şami sərzəminədə ıştə devləti dəvom bıdo.
DAİŞ və Cəbhətun-Nusrə dıqlə dıjdə təkfiri və terroristə dastə Suriyədə bin ki,çı reqiyoni kali ərəb və bəzi ğərbi devləton tərəfiku himoyə bedəbin.çın təkfiri iyən terroristə qrupon kəno,çandə qılə co terroristə dastəon həm mevcud be.Suriyədə çı ğərbıjon iyən çəvon reqinoal mıttəfiğon ofəyə behron,ın kişvərış bə təkfiri iyən terroristə dastəon həmməysə dıjdə mərkəz və poleqoniş təbdil kardəbe. DAİŞ və Cəbhətun-Nusrə dıqlə dıjdə təkfiri və terroristə dastə bəpeştə,həmməysə ziyodə fəoliyyət nışon doə ”Ceyşul-İslam” təkfiri iyən terroristə dastə be ki,əv həm sərost çı Səudiyyə Ərəbıstoni hartərəfinə himoyə jiyədə be.çın terroristə quruhi sərkərdə Zəhran Əluş be və əy ın terroritə dastəş 2013-ə sori bə vucudış varde.çı Zəhran Əluşi pı Ərəbıstonədə çı sələfiyon məşhurə muftiyonku qıləyni be.”İslomi ləşkər” çı 50 qılə hırdə radikalə sələfi dastəonku iborət be və çəvon veyni çı Dəməşğ və çəy ətof zonədə fəoliyyət nışon doydəbe.”ceyşul-islom” de Ərəbıstoni Suriyədə bıə ləşkəri nomi məşhur bin.ın nom bəçəy xoto bəvon noey bıəbe ki,çı Suriyə devləti mıxolifon milli kolaisiya bə Suriyə daxili silohinə ğıvvon dastəon coəti iyən təfrığə boyis be və Səudiyyə Ərəbıstoni səy kardedəbe de maliyyə iyən silohi koməkon əvoni çı Dəməşği kənoyədə ğərol bıdo və əvoni əyo mıttəfiğko.çın terroristə qrupon uzvon çandə da həzoku iborət be. Zəhran Əluş çı 2015-ə milodi sori oxoyədə dəğiğə formadə iyən çı naviku bə proqrami əsos bıə de aviatsiya ğıvvon vositə de ceyşul-islomi co çandə qılə yolə komandiron bə ico,kıştey be və bə ın terroristə dastə qıləy ciddiyə zərbə varid be.”Suriyə islomi cəbhə” suriyədə bıə co dıjdə təkfiri iyən terroristə qruponku qıləyni be.
