Fatimə(s) matəmədə

Fatimə(s) matəmədə

In rujon Əhli-Beyt(ə)-I tərəfdoron çı həzrəte Fatimə(s) matəmədən.qıləy Fatimə(s) peyğombər(s) ha vaxti bo vəhışti bu dıltanq bedəbe əy maçə və bu kardedəbe.peyğombər(s) çə həzrəti həxədə  “Ummu-Əbiha” yəni ıştə pı inə və “çımı bədəmi poə” sıxanon votedəbe və hamyedəbe:”…ha Fatmə ha! Xıdovənd bətı ğəzzəb kardə kəsi ğəzzəb kardedə və ıştıku rozi bıə kəsiku (əv)roziye”.

Bəle,Fatimə(s) ki,Xıdo piyə bandəy və çəy məhbube və nəinki,Xıdo çəyku rozi bıə kəsonku roziye iyən bəy ğəzzəb kardə kəsi ğəzzəb kardedə,bəlkəm əv əla və barzə ufuğədə bə qıləy vırə rəsə ki,Xıdovənde-Mutəal bə həzrəte Fatim(s) rizoyəti roziye və bə ə həzrəti ğəzəbi ğəzzəb kardedə.

Əmmo,həzrəte Fatimə(s) Xıdo-Rəsuli(s) yadiqar ıştə cıvonəti zəmonədə mərmuz iyən məchulə şikilədə bəfotış karde və hətto çə həzrəti ğəbiku həm hiç qıləy nışonə və riz manəni.məlum ni ki,aya peyğombər(s)-I məçitədəy və ıştə pı ğəbi kənoye və ya Bəği ğəbıstonədə dəfn kardə bıə və ya coqlə qıləy vırədə? bərosti ım benışonəti çiçi nışonəy?.

Imruj Xıdo-Rəsul(s)-I əzizə kinə şəhodəti ruji islomi dınyo bə matəm ğərğ bıən.

Həzrəte Fatimə(s) Mədinə məçitədə hanə xutbə de Fədəki xutbə nomi məşhure.qıləy vey ğəşənqə xutbə ki,fəsohət iyən bəloğəti əhl ,bın xutbədə bıə bəyoni şinəti,istidlal ğudrət və çəy mətonət,istiarati novon bəyon,kinoyəon və çəy mevzuon rənqarənqətiku bə heyrət omən.çoko ki,Bəhauddin Ərbili Hucri-Ğəməri haftminə əsri məşhurə tarıxəvon və muhəddis çın xutbə barədə jıqo nıvışteydə:”qıləy xutbə ki,çəyku nıbuvvəti furuğ iyən həşi dətıveydə və çı risoləti xoşə bu çəyku tərovət doydə və şiyə iyən sınni əvışon ıştə kitobonədə nəğl kardəşone”.

In xutbə zohirədə de iminə xəlifə vositə bə Fədəki boği ğəsb kardey xoto bıə etırozi  bəyon kardedə. Fədək Mədinə kənoyədə qıləy sərzəmin be ki,bəştə kifoyət ğədər bıə ovi,ziyodə nəxlston iyən xımo boğon və bəçəy çokə məhsulon xoto,vey əhəmiyyət kəsb kardedəbe.Hicrəti haftminə sori İslomi ləşkər mıvəffəğ bin de yəhudiyon əslə məskən bıə Xeybəri ğalə fəth kardey,həmonə vırə həm bə dast vardey dumo bin.Bə Fədəki yəhudiyon ın xəbə rəseyədə,əvon rəyrə ıştə nımoyəndəonışon çı peyğombər(s) palu vığandeşone və Fədəkışon bə Xıdo-Rəsuki(s) təslim kardeşone.peyğombər(s) həm bə şiyə iyən sınni mıfəssır iyən təfsirəvonon şoydəti əsos,İsra mıborəkə surə 22-ə ayə nuzuli bəpeştə ki,hamyedəbe ıştə nezə odəmon həxı bıdə,Fədəkış bə həzrəte Fatimə(s) baxşeşe.

Əmmo,Xıdo-Rəsuli(s) rehləti bəpeştə çandə ruji ərzədə islomi camiyədə qıləy dıjdə hodisə bə əməl ome ki,bəy bovə kardey vey saxt və muşkile.peyğombər(s)-I bəfoti da ruj bədiqə,iminə xəlifə çı həzrəte Fatimə(s) xıdmətçiyonış Fədəki boğiku xaric kardeşe və coqlə fərdonış bə həmonə vırə təyinış karde və jıləvoni Fədəkışon ğəsb karde.bəçəy xoto həzrəte Fatimə(s) boştə həxon bə dumo sıey xoto,bə Məscidun-Nəbiyy şe.

Çoko ki,voteşone peyğombər(s)-I kinə dılış heste de milləti qəp bıjəno,həmmə kəs bə peyğombər(s)-I məçiti iyən bəçəy ətrofi cəm bin ta çı həzrəti Fatimə(s) sıxanon bıməson.bo peyğombər(s)-I kinə bə məçit daxil bıey və əyo de milləti sıxan kardey xoto,məçiti kıncədə qıləy pardəşon ehaşte və həzrəte Fatimə(s) həm de çəy kəno hərəkət kardə jenon bə ico bə məçit varid be.Fatimə(s) bənə peyğombər(s)-I ğədəm şoydəbe və millət jıqo bızın çı peyğombər(s)-I lınqi sədo məseydəbin və ə həzrət ıştə sıxanon bino kardeydədə, jıqo bızın bəçəvon quşi çı peyğombər(s)-I sədo rəseydəbe.