Dəvardə haftə bə Miyonə Şərği hodisəon qıləy nəzə
Dəvardə haftə bə Miyonə Şərği hodisəon qıləy nəzə
Dəvardə pencşanbə de Bəhreyni milləti inğılobi həştminə sorəqardışi təsoduf kardedəbe.Bəhreyni millət 2011-ə milodi sori bə Ali-Xəlifə rejimi ələyh ğıyomışon karde. Bəjreyni məxloği həştminə sorəqardışi astanədə çandə sa nəfər poytəxt Manama mıxtəlifə məntəğəonədə iyən çın kişvəri co şəhronədə cəm bıəbin və çın kişvəri şəhidon şikili ıştə dastə qətə holədə bə Ali-Xəlifə rejimi zidd etırozinə mitinqon dəvordınedəbin.kali vıronədə min cumlə Bəhreyni şərğədə bıə Sətrə cəzirə və ləpəkədə mağaza soybon həm ıştə dukonışon dəbastəbe və şəhri sakinon həm deştə kə ruşnəon okuştey,bə Bəhreyni nizomi milləti etosney və repressivə hərəkəton siyosəti xoto,ıştə etırozon nışon doydəbin.Bəhreyni əmniyyət ğıvvon bənə dəvardə qırd həşt sori çın kişvəri qırd vıronədə bıə milləti etırozinə aksiyəşon de repressivə hərəkəton etosneşone və çandə da nəfərışon həm həbs kardeşone.
Bəhreyni siyosi cərəyonon həm de Bəhreyni milləti inğılobi həştminə sorəqardışi mınosibəti qıləy bəyoniyyə sadir kardeşone.Bəhreyni ”Əlvəfağul-İslomiyyə” cərəyon bəyoniyyədə ımsornə Bəhreyni milləti inğılobi həştminə sorəqardışi şuarışon de “izzət və rostbemon”şuari ğeydışon karde.
Bəhreyni ”Əlvəfağul-İslomiyyə” cəmiyyət ki,de Ali-Xəlifə rejimi vositə volo kardey be,ıştə bəyoniyyədə elonış karde:”Bəhreyni rejim ıştə hədəfon real kardeyədə de həmmə tərəfinə məğlubiyyəti dimbədim omə və bo Bəhreyni milləti məyişəti,ixtisodi,siyosi,diplomatik və bəşəri cəhəto bıə behronon həll kardey əvəzi,əvonış bə ın behronon batlağ dənoəşe.ım qıləy koye ki,Bəhreynış çandə da sor bə dumo şodoəşe və bə milli hakimiyyətiş zərbə jıə iyən dəvardə da sori ərzədə qırd siyosi,ixtisodi iyən sosyal noliyyəton çı dasto beşeyədə səhmış bıə”.
Həmonə holədə Əlvifağ islomi cəmyəti sər katib Şeyx Əli Səlman ki,2018-ə milodi sori oktyabrə manqi bo Ğətəri casusəti kardey bəhonə bıə de qıləy puçə ittihomi bə əbədi həbsi məhkum be,çı həbsxonəku de qıləy mesaji vositə,çı Bəhreyni milləti inğılobi həştminə sorəqardışış təbrik kardə və çəvonku de sulhamizə formə ıştə tələbon piyeş və həmçinin bın kişvərədə demokratiyə bə həyğət rəseyış tələb kardə.əv həmçinin Bəhreyni Ali-Xəlifə rejimikuş tələb kardə ki,bə milləti ğanuni və məşruyi həxə tələbon əməlko.zira,ın bo kişvəri ozavziye iyən əyo stabiləti bərğərol kardey yeqanə roye. Şeyx Əli Səlman həmçinin çı Bəhreyni milləti inğılobi həştminə sorəqardışi zəmonədə Polşə poytəxt Varşavədə dəvordınə bıə konfransədə ki,de seonist rejimi iminə vəzir benyamin netanyahu iyən de Amerkə xarici koon vəzir Mayk Pompeo bə ico Bəhreyn iyən co ərəbə kişvəron yolon həm iştirokışon kardə,təkidış kardə ki,əmə, çəmə de deşmınə seonist rejimi ıştə robitəon normal kardey koy mıxolifimon”.
Bəhreyni Ali-Xəlifə rejim bın dəvardə 8 sori ərzədə bo Bəhreyni milləti ğıyomi sədon etosneyro qıləy əmniyyəti strateqiyəkuş bəhrə barde. Çın strateqiyə nəticə Bəhreynədə penc həzosə vey siyosi məhbuson mevcud beıy və çın kişvəri çandə həzo insonon yarəjə və kıştey be.bın holədə Bəhreyni çandə da nəfər siysoi və məzhəbi rəhbəron min cumlə Şeyx İsa Ğasım çın kişvəri şəhrvandətiku bekardey bıə.çandə sa şoqird və tələbəon həm çın kişvəri təhsil mərkəzonku məhrum kardey bıə.siysoi məhbuson zindonədə işkəncə jiyədən və çın mevzu baərədə beynəl-xalğ insonə həxon onemonon çəşnavi və xəbərdorətişon doə.bın cəhətədə “Skay-layn” beynəl-xalğ huğuğ təşkilot ıştə hasornə hisobatədə bə Ali-Xəlifə rejimi 2018-ə milodi sori 86 qılə vırədə bə insonə həxon rioyət nıkardeyış ğeyd kardəşe və nıvıştəşe:”Bəhreyni nizomi ittihom kardə qırd insonə həxon fəolon çı bəşəri və bəyoni ozodəti barədə de beynəlxalğ ğanun və konvensiyaon zidde”.
