Təkfiri cərəyonon
Təkfiri cərəyonon
Ğərbi devləton həm aqahanə surətədə çın təkfiri iyən terroristonku bo ədolət tələb kardə iyən sulhi tərəfdor bıə əslə islomi zərbə jıeyro istifodə kardedən.
Islomi qırd məzhəbon alimon muhimmə vəzifəonku qıləyni bo iştimayi fiki Muhəmməd(s)-i vardə əslə dini mahiyyəti ruşinə formadə bəyon kardey və çı təkfiri vəy qəteye.jıqo ki,ın təkfiri cərəyonon islomi torıxədə hejo təhdidışon icod kardə və bə islomi camiyə zərəlo-ziyononışon jıə.əvon de əslə islomi iddio de co mısılmınon xuni ru kardey ko məşğul bıən və çı mısılmınon dini etığodınışon bə sıvoli ji bardə və əvonışon mırtəd,kofir zınə iyən çəvon xunonışon həlol kardə.təkfiri cərəyonon bə Ğıron iyən hədison zohiri əsos ıştə fiki iyən ideoloji bazaşon soxtə və ağliku bə diyəro ıştə təfkkurışon icod kardə.ın ko bəçəvon əmələdə ifrotçəti və kur-kuronə təəssıbkeşəti boyis be və çımi nəticədə həm bənə DAİŞ iyən co terroristə qrupon bə əməl ome ki,əvon çı co mısılmınon mığobilədə mandən.de Kərimə-Ğıron,rəvoyəton iyən Peyğombər(s)-i sirə tətbiği təbyini ko məşğul bıə əhli-sınnəti dini alimon de bənə mınhərifə DAİŞ terroristə qrupon nəzəriyyəon bıə farğon həm ımi çok-çoki ruşin kardedə ki,ım təkfiri cərəyonon mahiyyət çiçiku iborəte.
Təkfiri cərəyononçı islomi hukmon istinbotədə və mənbəon zıneyədə bəsə Ğıroni nəss,Rəsuli-Əkrəmi(s) iyən salehə sələfıon sirə səpe təmərkuz pəydu kardey və bəy təkid kardey və çı təkfiri təfəkkuri çın mənbəonku suiyi-istifodə kardey həxədə qıləy təhlili zərurət oşko bedə.çıro ki, DAİŞ terroristə qrup de ğərbi informasiyə qrupon iyən kali murtəce ərəbə rejimon koməki vositə,boştə beğal və vəhşiyanə hərkəton dəlil vardero bə Kərimə-Ğıron,rəvoyəton iyən Peyğombər(s)-i sirə istinod kardedən.bəçəy xoto lozıme ki,deKərimə-Ğıroni ayəon iyən nəbəvi rəvoyəton ruşin iyən oşko kardey,çın təkfiri təfəkkuri de peyğombər(s)-i vardə əslə dini ziddiyyət təşkil doey oşko və vazeh bedə.vəhhabiyyəti,bın oxonə da soronədə çı təkfiri cərəyonon təşkil pəydu kardey koyədə qıləy əsosə rolış ifo kardə. Səudiyyə Ərəbıstonədə çı vəhhabiyyəti torıx bə dı əsr çımi bənavi oqardeydə və çəy əsliyə nəzəriyyəçi Muhəmməd bin Əbdulvəhhab bıə.əv de tohid iyən sələfiçəti iddio binoş karde bo İbn Teymiyyə təkfiri əğedəon tərvic kardey.Muhəmməd bin Əbdulvəhhab ıştə zallə və inhirofə ayini de tohidi nomi,həlbəttə nəinki, Kərimə-Ğıron,rəvoyəton iyən Peyğombər(s)-i sirədə mevcud bıə tohid,təblığ kardedəbe.əv bəştə bovəon əsos, qırd mısılmınon mışrik iyən bıtpərəst zıneydəbe və çəvon xunon ru kardey həlol iyən çəvon molon ğarət kardey mubah və cayiz zıneydəbe.Muhəmməd bin Əbdulvəhhab votedəbe:”əkəson ki,firiştə iyən peyğombəron şəfi` ğərol doydən və deçəy vositə pərvərdıqori palu təğərrıb iyən nez bıy dumon,çəvon xunon həlol və əvoni ğətl kardey həm cayize”.
