İmom Huseyn(ə)-i ğıyomi icodəkə zəminəon-3

İmom Huseyn(ə)-i ğıyomi icodəkə zəminəon-3

Bəle,əhli-kitobiku xısusiyyətonku qıləyni ım be ki,əvon dumo yənde ilahi əhd-peymoni darıştəbin və kali sıftənə mısılmınon  kur-kuronə bəvon tabe bıey barədə peyğombər(s) hamyeşe:”şımə həm islomi dastqirəon bəsə iyande bədiqə,dəbarıştiyon”.əmmo,peyğombər(s)-i təkid kardə vey muhimmə çi ıme ki,hamyedə:şımə sıftənə darıştə çi əmonəte.yəni həmonə telə həyğəte ki,Ğıron de ojə-oşkoə holəti hamyeşe:”ha (zohirədə)imon vardə kəson ha! bə Xıdo,peyğombər(s) iyən (bəşmə aspardə bıə) əmonəton,qıləy holədə ki,şımə çəvonku aqahiyon,xəyonət məkənən”.(Ənfal-37)....

Bın zəmon Xıdo-Rəsul(s) hamyeşe:çımı çəvonku qıləyni məğsəd Ğırone və coqləyni çımı itrəte və peşo çı dıqlə muhimmə mevzuonku bəhs kardedə və hamyedə:de tosə Kovsəri hovuzi daxil bıey ım dıqlə boho ğeymətinə əmonət hiçvaxti iyandeyku co nibəbe və şımə hiçvaxti çəvonku co məbənən ta bə həlokət və məhf bıey dımo məbənən....

 Çun,çəmə hədəf bın bərnomədə Aşurə fociyə bə əməl omey rəğ-rişəon pəydu kardeye,hejo çın sıvoliku bəhs bedə ki,çıro çı həzrəte peyğombər(s)-i mələkuitiyə rehləti bəpeştə bilofosilə islomi ummət jıqo əvəz be və  bo itrəti yəni peyğombər(s)-i əhli-beyti(s) çı xilofət,imomət və viloyəti dayirəku xaric kardey xoto,”Xıdo kitob bəmə vəs kardedə” şuorışon doe.(Səhih-Buxari-cild -1-səyfə 22).

Kali səthi nəzə kardə təhliləkəyon bə ın torıxi və tale həllləkə sıvoli yəni boçi bə peyğombər(s)-i aspardə ın dıqlə əmonəti boçi jıqo rəftor be,fəğət çı peyğombər(s)-i pokə bədəmi zəminisə bıə zəmonədə dıqlə dastə yəni Mıhociron de Ənsari miyono mıbohisə və ixtilofi ğeyd kardedən və demi həm vəs kardedən.coqləyni dastə hiç qıləy məntıği nəticə nıstənə holədə fəğət bə ın inhirofi hərəkəti plani kəşə kəson işorə kardedən və sayirə.qıləy holədə ki,bo ın həyğəton dırıst və səhihə şikilədə ruşin və təbyin kardero,de sənədi iyən ğaneəkə cəvobon varde bəbe ki,çın hərəkəton bə əməl omey  bınə və rişə nışon doydə....

Qıləy hərəkət ki,de qıləy siyosi niyyəti icod be,əmmo de dini ranq və bu bə əməl ome.qıləy zəmon ki, çı həzrəte peyğombər(s)-i mələkuitiyə rehləti zəmon boəvon ğəti be əvon hiççiku nıtarsə holədə ıştə planışon əməli surətədə bə jimon dəvordıneşone və icro kardeşone ta nəhoyətən bə nəbəvi təlimon əks və bə ğəbiləvi təəssıbon əsos,əvon kardeyışon zıne çı  Xıdo-Rəsuli(s) deçəy bəfodorə yaro-yavəron vistı se sornə mıcohidət,əzob-əziyyət,təhdid,təhrim və təbidon hosil bıə islomi camiyə səhih və bə kəmol rosnə hərəkəti ,bə inhirofi səmt bıkəşon və islomi dini-demokratikə nizomi rəhbərəti bə səltənət və irsi hukuməti tərəf sovğ bıdo və nəhoyətədə həm islomi jimon baxş kardə noliyyəton çı dasto bışo və bə islomi zidd qıləy fərhənq torıxi dırozi bə əməl booy.....

İslomi əzizə peyğombər(s)-i ıştə besəti bino kardə yəni Məkkə sərzəminədə bo islomi dini təbliğ və pevolo karde zəminiku,Ğureyşi əşraf və yolon bə dıqlə dastə təğsım bin.iqlə quruh bənə əbu sufyan və əbi ləhəbi deştə qırd zu və ğudrəti bə səhnə omin və bə islomi peyğombəri(s) ələyh ıştə qırd zukuşon oko doe.çı vəhşiyonə işkəncəku qətə de tosə bənə co ixtisodi mıhosirə və mısılmınon təğib kardey və sayirə.ımon boyis bin ki,mısılmınonku idastə sıtəm vində kəson bə Həbəşə hicrətkon və mışrikon həm peyğombər(s)-i terror kardey dumo bin.əvon hətto peyğombər(s) çı Məkkəku bə Mədinə şəhri hicrət kardey bəpeştə həm ıştə de ə həzrəti bıə deşımonətiku dastışon nıkəşe,çandə qılə canqışon bə əməl varde və de tobə Məkkə fəthi əvon təslim bıey fikədə nıbin.

Ğureyşiku coqləyni qrup de har tərəfinə təhğıği bə ın nəticə rəsin ki,qıləy dini iyən siyosi təşəkkul icodkon ta itərəfiku qıləy dini ranqı-bu bəştə peqto və co tərəfiku həm ıştə siyosi hədəfon de zəmoni dəvardey təğib və əməli surətədə icrokon...

De ın ko rabitədə dıqlə muhimmə nuktə dığğət kardənine ki,ım təşəkkul Məkkədə və təğribən çı Rəsuli-Əkrəmi(s) besəti sıftədə bə formə dəşe və həmən həmonə fərdon çı həzrəte peyğombər(s)-i mələkuitiyə rehləti bəpeştə bilofosilə Bəni-Saidə Səğifədə iştirokışon  karde ki,ımi bəyon kardedə ki,ım siyosi-dini təşəkkul de komilə formə çı qıləy hədəfi dumo bıən.ımi həm votey lozıme ki,Səğifə odəmon boştə hiç qıləy siyosi niyət və motivi nıbey nışon doeyro,hejo çı peyğombər(s)-i kənoyədə bin və qıləy rol ifo kardedəbin.əmmo,çoko ki,Xıdo-Rəsul(s) bəvon de cıvonə Usamə sərkərdəti bə Rumi səmt şıey əmrış karde və əvon bənə de Usamə cıvonəti iyən peyğombəri coyli haştey bəhonəon bə ə həzrəti ın əmri nıpemandin və həzrəte peyğombər(s) həm çəvon ım koyku vey norohət be və bəvon nifin iyən nəhlətış karde.