Təkfiri cərəyanon
Təkfiri cərəyanon
”Ehğağul-Həğğ” kitobədə Əmirəl-Muminin Əli(ə)-iku nəğl bıə qıləy hədisədə çı siyuə pərçəmon həxədə işorə bıə ki,çəvon botılə royədə bıey nışon doydə.ım rəvoyət çəvon kali xısusiyyəton bə yod ənoydə bə əvoni mızəmmət kardedə.məsələn:çəvon hozi iyən sığə dıləti həxədə,çəvon bə hiç qıləy əhd-peymoni rioyət nibəkardeyn.(zohirədə)bə həxı tərəf dəvət kardedən.əmmo əvon həxı əhl nin. çəvon nomon deçəvon kunyə nomiye və çəvon nəsəb və familyəon həm deçəvon şəhron nomiye (bənə Əlbəğdadi,Şişani,Əlbritani və Ələnbari və sayirə) ın rəvoyət təkid kardedə ki,əvoni vində zəmonədə bə zəmini dəçıkənən və hərəkət məkənən.yəni çəvon dəvət botıle,bəvon anqıl məqınınən və komək həm məkənən.iyo çın sıvoliku bəhs bedə ki,təkfiri cərəyonon məxsusən DAİŞ bə siyuə pərçəmonku bəhs kardə rəvoyəti istinodən ıştəni çəy eyni nımunə hisob kardedən və ıştəni həx və çın hədisiku bəştə nəf` iyən xeyri mısodirə kardedən.qıləy holədə ki,rəvoyətədə bə botılə pərçəmon həm işorə bıə.təsadufən çı botılə pərçəmon nışonə və əlaomətonku kali qıləyni de ın dastə xısusiyyəton məxsusən de DAİŞ-i tətbiğ kardedə.bə oxonə zəmonə ayid bıə hədison bəpe de eksperton və de metəbər iyən xatırcəmə mənbəon roy vositə təhğiğ kardey bıbu.ın hədison bəpe bəştə dıli piye və mənafeyon əsos təhlil kardey bıbu.ın proses torıxi drozi bə islomi zərbə və ziyononış rosnə.çəy mıosirə nımunə DAİŞ və sayir təkfiriyə dastəonin ki,de ayəon iyən rəvoyətonku səhvə təhlili,roşon kulliyə formədə qimışon kardə.... Min cumlə təkfiri sələfiyon cərəyonədə çəvon nəzəriyyəçiyon miyono muhimmə ifodəonku qıləyni, ”Əlxilafətu əla minhacun-nəbiyy”(bə peyğombəri sirə və şıə roy əsos xilofət) təşkil doey zəruriyyəte.bə peyğombər(s)-i qıləy hədisi əsos ki,Əhməd ibn Hənbəli əvış nəğl kardə,sıtəmkorə podşoə hukuməti bədiqə,oxonə zəmonədə duborə xilofət bə peyğombər(s)-i sınnət və şıə roy əsos təşkil bəbe.””təkunu fikum....şımə miyono nıbuvvət bəbe ta bə vəxti ki,Xıdo bıpyoşe.peşo havaxti Xıdo bıpyişe,əy dəbəparçıne.çəy bədiqə bə nıbuvvəti əsos xiolfət bəbe ta ə zəmoni ki,Xıdo bıpyişe.çən,havaxti ki,Xıdo bıpyişe çəy rınə dəbəparçıne.həm podşoon bəbe ki,ta bə vəxti ki,Xıdo bıpyişe.çən,havaxti Xıdovəndi piyeşe əy dəbəparçıne.peşo zılmkorə podşoon bəbeyn ta əzəmoni ki,Xıdovəndi bıpyişe.peşo havaxti Xıdovəndi piyeşe əy dəbəparçıne.çəy bədiqə həm bə peyğombər(s)-i sınnət və şıə roy əsos,xilofət bəbe.” Təkfiriyon nəzəku,ımrujnə camiyə kulliyə formaədə cohili camiyə hisob bedə və bəpe raşidi xuləfa və salehə sələfon əsri tərəf oqardıney bıbəmon.çəvon nəzəku islomi xilofəti təsis kardey bə jıqo qıləy hədəfi rəseyro,həmməysə muhimmə hərəkəte.Misri əhliku bıə Əbdussəlom Fərəc ki,çı təkfiriyon rəhbəronkuye,”Əlfərizətul ğayibə” kitobədə bə şımşi təkyə kardə holədə islomi hukuməti bərpo kardey zəruriyyəti həxədə nıvıştedə :zəmini dimisə ilahi hukmon bərpo kardey bə həmmə kəsi vocibe və çəy dumo islomi devləti bərpo kardey həm bə həmmə mısılmınon vocibe.çıro ki,əv de ın vocibi əncom doey vocib bedə.” Çoko ki, çı Əbdussəlom Fərəci votə sıxanobku məşhud və oşkoye,təkfiri cərəyonon boçəvon nzədə qətə xilofəti təşkil doeyro nışon doə ro,nəhoyətən de canq və ğətli roy vositə bəsə omeydə.həlbəttə,sənəd və fakton nışon doydə ki,çə həmonə canq və ğitoliku məğsəd,hejo de mısılmınone,nəyinki,de cokəson.əmmo,çəvon nəzədə qətə hukuməti ulqu struktur və funksiya nəzəku, dəvardə torıx iyən raşidin xilofəti əsrədə rişəş heste.
