Təkfiri cərəyanon

Təkfiri cərəyanon

Təkfiri vəhhabiyon bə dini yolon və məxsusən peyğombər(s)-i təkrim kardey iyən bə ə həzrəti ehtırom noey qıləy holədə ğədəğən kardedən ki,Kərimə-Ğıron bə peyğombər(s)-i təkrim kardey işorə kardedə və hamyedə:”və rəfə`na ləkə zikrək” yəni əmə ıştı nom və zikrımon barz karde”.Kərimə-Ğıroni Şura mıborəkə surə 23-ə şərifə ayədə mısılmınonku bə peyğombər(s)-i pokə xıyzoni məhəbbət  iyən dustəti səmt vanq jeydə və hamyedə:ğul la əsələ...vuji:şıməku bə ın(risoləti) xoto,ğərəz bəçımı nezə odəmon  dustətisə co qıləy çi hiçi piyedəmni”.

Kərimə-Ğıron de ojə-oşkoə  holəti çəməku tələbış kardə ki,bəpe çı peyğombər(s)-i nezə odəmon bıpyəmon iyən bəvon məhəbbət nışon bıdəmon.məhəbbəti ibzor kardey roonku qıləyni ıme ki, peyğombər(s) iyən çə həzrəti pokə avlodon bıə mə`sumə imomon və əhli-beyt(ə)-i vilodət və milodi rujonədə mərosimon bərpokəmon və həmonə rujon çəvon sərquzəşton,islomi royədə bıə cəhdon və confışonətiyonku sıxan bıvotəmon.usulən milləti de bə  peyğombər(s)-i  iyən bəçəy pokə əhli-beyt(ə)-i  məhəbbət nışon doey iyən dustəti ibroz kardey məğsədi jıqo məclison bərpo və təşkil bedə və həmonə məclisonədə iştirok kardə kəson de Kərimə-Ğıron,dini ovliyaon  iyən islomi ruşinəkə həyğəton iyən təlimon  oşno bəbeyn.aya ın ko şırk iyən bidəte?Həcci mıborkə surə 32-ə şərifə ayədə de təğvaninə dılon vositə çı Xıdovəndi iyən çəy dini şuaron yol qətey elon kardedə.joqo ki,hamyedə:”və mən yuəzzim.....və hakəs ilahi şuaron əziz bıqəto,çən ım(çı)dılon təğvakuye”.bə peyğombər(s)-i ş`ən və məğami təkrim kardey iyən ehtırom noey həm ıştən çı ilahi şuaronku hisob bedə.zira,ım bə milləti imoni zumandəti və aqahəti boyis bedə.peyğombər(s) ıştən həm de qıləy roy vositə çəy vilodəti bərpo kardey məşruiyyət və qanuni bıeyış səhih zınə.joqo ki,Əhli-Sınnəti məşhurə ktobonku qıləyni bıə Səhihe-Muslimi kitobədə bın barədə omə:”suilə....Xıdo-Rəsul(s)-iku çı dışambə ruji rujə qəteyku sıvol be,hamyeşe:bəçəy xotoye ki,mı bə ruji mutəvəllid bıəm və bə ruji Ğıron bəmı nozil bıə”....

Misri sələfiyon rəhbəronku bıə şeyx Səid Əbdul-Əzim dəvardə sori qıləy fətvoş doe ki,bo Peyğombəre-Əkrəm(s)-i milod və təvəlludi ruji dəvordıney və id kardey hərome və iddioş karde ki,peyğombər(s)-i  milodi ruji id qətey bidət iyən ro qim kardeye.əy iddioş karde ki,de ın ruji mınosibəti id və şoyvonəti kardey,qıləy nuyə koye və bidəte və ın məsələ səhobəon zəmonədə,həmçinin bın dəvardə soron ərzədə mevcud bıəni və ehanə ım ko bə zəmonədə həm bə əməl oməbe,ijən bidət bə hisob əvoy. Bə Misri ”Darul-Fətəva” nezətiş bıə çın təkfiriyon bə ğeyri-addi fətvoon nəzorət kardə mərkəz,bə ın fətvo cəvobədə elonış karde ki,Hicri-Ğəməri çominə əsriku de tosə ısət qırd mısılmonə alimon,bo Peyğombəre-Əkrəm(s)-i milod və təvəlludi ruji dəvordıney və həmonə ruji id kardey ğanuni bıey nəzədə icmoşon heste və ım ko ğəbul kardedən və hətto i dastə alim iyən fəğihon həmonə ruji idışon mıstəhəb hisob kardə və bın zəminədə həm dəlilonışon vardə.ın mərkəz çın bəhsi dəvomədə votedə ki,Kərimə-Ğıron çı Peyğombəre-Əkrəm(s)-i vucudiku bənə “Rəhmətun-lilaləmin” nomi (bo aləmon rəhmət) nomi ğeyd kardedə və ın rəhmət bə qıləy xass və məxsusə ko məhdud ni.bəlkəm,bəşəriyyəti tərbiyə,təlim iyən hidoyəti bə sıratəl-muztəğimi səmte və həmçinin bə torıxi qıləy məxsusə zəmoni muxtəss ni.bəlkəm,qırd devron iyən zəmononədə bıə və  ım ko torıxi dırozi dəvomış pəydu kardə.bənə təkfiri cərəyonon  sərmənşə bıə ğərəz vəhhabi fırğə,qırd islomi məzhəbon ,bə ağli iyən nəğli dəlilon istinod kardə holədə bo Peyğombəre-Əkrəm(s)-i milod və təvəlludi ruji dəvordıney və həmonə ruji  id kardey bidətışon zınəni,bəlkəm bəy etığodışon həm heste.bə həmonə dəlili xoto,ğərəz Səudiyyə Ərəbıstoni qırd islomi məmləkətonədə Peyğombəre-Əzəm(s)-i milodi ruj tətile  və həmonə ruj koy ruj ni.İslomi əzizə peyğombər(s) çı mısılmınon vəhdət iyən ibemoni əsose.binobərin,peyğombər(s)-i təvəlludi ruji id qətey və həmonə ruji çə həzrəti nomi kəşey və bəy təkrim kardey və bın ruji mısılmınon bə həzrəti yolə şəxsiyyəti məhəbbət nışon doey,çı mısılmınon vəhdəti oqəteyro həmməysə əsosin və yolə ğədəmonku bə hisob omeydə.bəçəy xoto,oxonə soron dırozi islomi deşmınon çandə kərə bə islomi əziziə peyğombəri(s) mığəddəsə zoti həmləşon kardə və bo çə həzrəti şəxsiyyəti təhrif kardero cəhdonışon kardə.Səlman Ruşdi nıvıştə “şəytoni ayəon” kitob və coqlə ihonət və təhğıron çı karikaturə ğolıbədə və de yavə filmon Avropədə bın dəvardə soron bə əməlışon vardə,nışon doydə ki,islomofobon çı islomi peyğombər(s)-i yol və barzə şəxsiyyəti təhrif kardey dumon və bo həzrəti iyən çəy vardə islomi dini sulhamizə sima təxrib kardero səyon kardedən.həyğətədə,de təkfiri cərəyonon vositə bo Peyğombəre-Əkrəm(s)-i milod və təvəlludi ruji dəvordıney və id kardey,həmçinin çə həzrəti rehləti ruji ğəmqin bıey  bidət zıney,çəvon de islomi deşmınon bıə həmrayəti iyən i cəhətədə bıey nışon doydə.