Təkfiri cərəyanon

Təkfiri cərəyanon

Təkfiri vəhhabiyon coqlə səhfə bovəonku qıləyni şəfoəti mevzu şırk hisob kardeye.əvon jıqo hisob kardedə ki,insoni de ğeybi aləmi harcurnə rabitə nodırıst və mərdude və de ğeybi aləmi rabitədə bıey iyən bə qıləy ğeybi ğudrəti malik bıey kufre.çun,ğeyb fəğət Xıdovəndi ixtiyori dastədəy.əvon bə bın səhfə bovə təkid kardedən ki,şəfoətədə votey nibəzınemon Şəfi iyən şəfoətəkə de ğeybi irtibat və rabitəş heste və əv kardey nibəzıne Xıdovəndi uluhiyyətədə bıə koon mıdoxiləko və bın etığodədə bıey şırke.Təkfiri dastəon boştə bın əğedə nə Kərimə-Ğıronədə və nə islomi şəryətədə hiç qıləy metəbərə sənəd nıbə holədə,harcurnə ğəbi ziyorət kardey,dini yolon ğəbi və zərihi maçə kardey və çəvon istimdod və komək tələb kardey,ğədəğəne və bə kufri boyis bedə.İslomi qırd mıxtəlifə məzhəbon bə şəfoəti məşru ğanuni bıey iyən İslomi əzizə peyğombəri(s) ğıyoməti ruji Şəfi iyən şəfoətəkəyonku qıləyniye,muttəğfiğul-ğovlin və ımi həmməy ğəbul kardedən və fəğət çı şəfoəti kali furu və hissəonədə çəvon miyono nəzə ixtilofon mevcude..... Təkfiri vəhhabiyon votedən ki,ğeybi ğudrət de Xıdovəndi uluhiyyəti təaruz və ziddiyətış heste və bə kufri boyis bedə və bə Ğıroni ğətiyə fakton istinodən rədd ebdə və ğəbul bedəni.çıro ki,mıxtəlifə ayəonədə şəfoəti məsələ və bənə peyğombəron bıə insononədə ğeybi ğudrət təyid iyən təsdığ bıə.bın barədə bə həzrəte Yusif(ə)-i Kərimə-Ğıronədə bıə dastoni işorə kardey bəbe.Yusifi mıborəkə surədə omə ki,həzrəte Yusif(ə)-i şəy ki,çı pambə maddəkuye,de bə həzrəte Yəğub(ə)-i dimi ləms kardey bə ə həzrəti çəşon oj bıey boyis bedə və ım çı ğeybi ğudrəti nışonəonkuye ki,bə həzrəte Yusiif(ə)-i doy bıə.bə şifo boyis bıə çi çı Yusif(ə)-i pokə nəfse ki,ım bəçəy pı təsir kardedə,nəyinki,mıstəğilə formaədə həmonə pambə olət... Vəhhabi təkfiriyon bə kali ayə və rəvoyəton istinodən,şəfoəti fəğət bə Xıdo məxsus iyən munhəsir zıneydən.əvon Zuməri mıborkə surə 44-ə şərifə ayə əsos qəteydən.joqo ki,hamyedə:”Ğul lillahi....vuji şəfoət fəğət bə Xıdo məxsuse.osmonon iyən zəmini hukmronəti fəğət bəy məxsuse.peşo bəçəy səmt oqordıney bəbiyon”.çımi cəvobədə bəbe votey bıbu ki,şəfoət vey barzə məğami nəzdədə bə əməl omeydə.aya hestemoni aləmədə ikəs bəsə Xıdoku bəpeye ki,Xıdo çəy palu bo cokəson şəfoətko?qıləy holədə ki,əv çı qırd mevcudatonsə bəpe və barze.əv çı hiçkəsi palu şəfoət nibəkarde və əsosən jıqo qıləy fərziyyə çəy barədə təsəvvır ni.zira,əv çı osmonon iyən zəmini malik və soybe.çən,”şəfoət fəğət bə Xıdo məxsuse” məno ki,ayədə omə,ıme ki,əv çı şəfoəti əsliyə malike.həlbəttə,əv bə hakəsi ki,izn iyən icozə bıdo,şəfoət kardey bəzıne ,əmmo har qıləy şəfoət oxoyədə bə Xıdo oqardedə və çəy izn iyən icozə nıbə holədə şəfoət mumkin ni.çımisə əlovə Kərimə-Ğıroni ayəon şəfoəti fəğət bə Xıdo məxsus iyən munhəsir zıneydəni.min cumlə Məryəmi mıborəkə surə 87-ə şərifə ayədə omə:”la yəmlikul....əvon şəfoəti ixtiyorışon ni illa əkəs ki,Rəhmonə Xıdo palu əhd iyən peymon bıə kəson”.Bəğərə mıborəkə surə 255-ə şərifə ayədə həm ğərəz Xıdo cokəson şəfoəti təsdığ kardedə.joqo ki,hamyedə:”mən zəlləzi...kiye əkəs ki, ğərəz deçəy izni çəy nəzdədə şəfoətko”.çən,de ın izohon de Xıdovəndi izni kali fərdon şəfoət kardey bəzıneyn . Təkfiriyon de bə Taha mıborəkə surə 109-ə şərifə ayəson əsos,şəfoət bə ğıyoməti ruji və bə Xıdovəndi məxsus zıneydə.ım qıləy holədəy ki,Ğıroni ayəon həm dınyoədə bə peyğombər(s)-i şəfoəti dəlolət kardedə.min cumlə Nisa mıborəkə surə 64-ə şərifə ayədəomə:”və əmə har qıləy pəyğombər ki, vığandemone illa ki, de Xıdo izni bəy itoətkon və əvon bəştə sıtəm kardeyədə ıştı palu omin və Xıdoku baxşeş tələbkon və peyğombər həm boəvon məğfərət tələbko,hukmən Xıdo tobə ğəbuləkə və mehribon bəvindeyn”.təkfiriyon peyğombər(s) iyən dini ovliyaon şəfoəti rədd kardey,mardə insononku şəfoəti tələb kardey qıləy bihudə və hədərə ko hisob kardedən.bın barədə bə Nəmli mıborəkə surə 80-ə şərifə ayə həm istinod kardedən.joqo ki,hamyedə:”beşək,tı bə bımyon quşi ıştə sıxani rosney əzıniş və əy bə deəvon dimbədim omə zəmonədə ıştə peşti qordınə koron məsovney əzniş”.ın ayə həxıku dim qordınə kofir iyən mışrikon bə bımyon iyən mardə kəson təşbih kardedə.de Kərimə-Ğıroni təbiri şəhidon bəyjin və Xıdovəndi palu neməti dılədən.təbiiye peyğombər ki,Xıdovəndi palu qıləy barzə məğamış heste,çı bın dınyoədə və çı ə həzrəti bəfoti bədiqə,çəmə dıvo iyən şəfoəti məseydə.çoko ki,pok iyən vıjniyə bıə insonon bərzəxi aləmədə çəmə sıxan iyən tələbon məseydən.dığğər kardəninə coqlə nuktə ıme ki, həmmə mısılmınon ıştə harujnə penc zəmon nımojonədə bə islomi peyğombəri(s) səlom vığandedən. əgər Xıdo-Rəsul(s) çı bəyjiyə şəxson səlom iyən xəbon məseydənibu,jəqoədə ım səlomon mənoş ni. çən, çəmə bə islomi əzizə peyğombər(s)-i səlom,dıvo iyən tələb rəseydə və ə həzrət çəmə barədə həm şəfoət kardey bəzıne......