Təkfiri cərəyanon

Təkfiri cərəyanon

Təkfiriyon de bə Taha mıborəkə surə 109-ə şərifə ayəson əsos,şəfoət bə ğıyoməti ruji və bə Xıdovəndi məxsus zıneydə.ım qıləy holədəy ki,Ğıroni ayəon həm dınyoədə bə peyğombər(s)-i şəfoəti dəlolət kardedə.min cumlə Nisa mıborəkə surə 64-ə şərifə ayədəomə:”və əmə har qıləy pəyğombər ki, vığandemone illa ki, de Xıdo izni bəy itoətkon və əvon bəştə sıtəm kardeyədə ıştı palu omin və Xıdoku baxşeş tələbkon və peyğombər həm boəvon məğfərət tələbko,hukmən Xıdo tobə ğəbuləkə və mehribon bəvindeyn”.təkfiriyon peyğombər(s) iyən dini ovliyaon şəfoəti rədd kardey,mardə insononku şəfoəti tələb kardey qıləy bihudə və hədərə ko hisob kardedən.bın barədə bə Nəmli mıborəkə surə 80-ə şərifə ayə həm istinod kardedən.joqo ki,hamyedə:”beşək,tı bə bımyon quşi ıştə sıxani rosney əzıniş və əy bə deəvon dimbədim omə zəmonədə ıştə peşti qordınə koron məsovney əzniş”.ın ayə həxıku dim qordınə kofir iyən mışrikon bə bımyon iyən mardə kəson təşbih kardedə.de Kərimə-Ğıroni təbiri şəhidon bəyjin və Xıdovəndi palu neməti dılədən.təbiiye peyğombər ki,Xıdovəndi palu qıləy barzə məğamış heste,çı bın dınyoədə və çı ə həzrəti bəfoti bədiqə,çəmə dıvo iyən şəfoəti məseydə.çoko ki,pok iyən vıjniyə bıə insonon bərzəxi aləmədə çəmə sıxan iyən tələbon məseydən.dığğər kardəninə coqlə nuktə ıme ki, həmmə mısılmınon ıştə harujnə penc zəmon nımojonədə bə islomi peyğombəri(s) səlom vığandedən. əgər Xıdo-Rəsul(s) çı bəyjiyə şəxson səlom iyən xəbon məseydənibu,jəqoədə ım səlomon mənoş ni. çən, çəmə bə islomi əzizə peyğombər(s)-i səlom,dıvo iyən tələb rəseydə və ə həzrət çəmə barədə həm şəfoət kardey bəzıne......

Əhməd bin Hənbəli Musnəd və Səhih-Buxariyədə peyğombər(s)-iku omə rəsə qıləy hədisədə heste ki,bə ə həzrəti Şəfii iyən Şəfoətkə bıey dəlolət kardedə.joqo ki,ə həzrət hamyedə:”U`tiyət....penc qılə çi bəmı doey bıə ki,çımı bənav bə hiçki doey bıəni: zəmin bomı səjdəqo və pok ğərol doey bıə,ğənimət bomı həlol ğərol doey bıə,de bə(deşımınon dıli)tars eğandey bəmı komək kardey bıə,”Cəvamiul-Kəlam(Ğıron) bəmı doey bıə və şəfoət bəmı əto kardey bıə”.həmçinin Əhməd bin Hənbəl peyğombər(s)-iku nəğl kardedə:”peyğombəron,bə Xıdo vohidəti de ixlosi şəhdoət doə qırd kəson şəfoət şəfoət kardedən və əvoni çı çı cəhəndımiku xaric bəkardeyn”.əhlı-sınnəti etımod kardə və məşhurə alim  Əli ibn Əhməd Səhmudi (Hicri-Ğəməri 911-ə sori mutəvəffi) ”Vəfaul-Vəfa” kitobədə omə:Xıdovəndi nəzədədə peyğombər(s) iyən çə həzrəti yolə məğam və şəxsiyyətiku komək iyən şəfoət tələb kardey,həm çə həzrəti xılğəti bənav və həm çə həzrəti təvəlludi bədiqə və həmən çə həzrəti rehləti bəpeştə cayize.həm bərzəxi aləmədə və həmən ğıyoməti ruji cayize.peşo Odəm(ə)-i bə islomi-peyğombəri(s) təvəssul kardey barədə bıə məşhurə hədisi çı umər bin xəttabiku nəğl kardedə ki,Odəm(ə) bə islomi-peyğombəri(s) vəomədə bıə xılğəti məlumati xoto,bə Xıdovəndi dərqo jıqo ərzış karde:Xıdolim ha! bə Muhəmmədi(s) həxı xoto,ıştıku tələb kardedəm ki,mıro bıbaxş”.

Çı şəfoəti navnə şərtonış həm mevcude.qıləy inson çı peyğombəri(s) iyən Xıdo ovliyaon şəfoətiku foydə bardey bəzıne.əmmo,de ın şərti ki,əv çı imoni qohər iyən salehə əməliku bəhrəş bıbu və lozım bıə zəminəon hozzıko.liza,ikəs ki,bə Xıdo etığod iyn dini təlimonku dim bıqordıno və bə çandə nev fəsod iyən cinoyəton ğərğ bıbu,həni şəfoət bəçəy holi şomil nibəbe.Kərimə-Ğıroni oşkoə ayəon çı şəfoəti həxədə hiç qıləy tərdid iyən şəkkış baği haştəşni.əmmo,təkfiri cərəyonon de bə sısıt iyən bəsosə dəlilon təkyə və peştıpur bıə holədə,şəfoəti məsələ inkor kardedən.

Təkfiri cərəyonon deştə duyə təbliğaton əy bə sıvoli ji bardə mevzuonku qıləyni həm ğəbon ziyorət kardey məsələy.islomi-torıxədə çı umum mısılmınon miyono yolə şəxsiyyəton ğəbon ziyorət kardey qıləy mıstəhəbb iyən bə xoş omə ko tələğği bıə.ım ko iminə kərə ğədəğən kardə kəs,ibn teymiyyə bıə.əv çı peyğombəri(s)-iku hejo çə həzrəti ğəbi ziyorəti həxədə bıə qırd hədisonış zəyif,pesoxtə bıə iyən  etımod kardənin nıbə hədisış hisob kardə.səudiyyə ərəbıstoni sabiğ mufti ben baz həm Xıdo ovliya iyən  peyğombəri(s)-i ğəbi kəno harcurnə dıvo,istiğasə,ğıboni iyən nəzr kardeyış  bənə çı bıt,doon iyən sığon palu kardə bıə dıvo iyən istiğasə mislədə zıneydə və əy şırk hisob kardedə.əv həmçinin de ğəbon ziyorəti niyyəti ıştə kəku hərəkəti bidət bə hisob vardedə.əv ğərəz Xıdo cokəson dıvo,vanq və istiğasə kardey iyən ğəbon ziyorəti rədd kardeyədə,bə Muminun mıborəkə surə 117-ə şərifə ayəistinod kardedə.jqo ki, hamyedə: və mən.....və hakəs de Xıdovəndi vucudi co qılə mə`bud vanqko ki,boəy hiç qıləy dəlilış ni,çən çəy hisob çəy pərvərdıqori nəzdədə bəbe.hukmən Xıdovənd kofiron nicot nibədoe”......