Təkfiri cərəyanon
Təkfiri cərəyanon
Təkfiri cərəyanon
Çı şəfoəti navnə şərtonış həm mevcude.qıləy inson çı peyğombəri(s) iyən Xıdo ovliyaon şəfoətiku foydə bardey bəzıne.əmmo,de ın şərti ki,əv çı imoni qohər iyən salehə əməliku bəhrəş bıbu və lozım bıə zəminəon hozzıko.liza,ikəs ki,bə Xıdo etığod iyn dini təlimonku dim bıqordıno və bə çandə nev fəsod iyən cinoyəton ğərğ bıbu,həni şəfoət bəçəy holi şomil nibəbe.Kərimə-Ğıroni oşkoə ayəon çı şəfoəti həxədə hiç qıləy tərdid iyən şəkkış baği haştəşni.əmmo,təkfiri cərəyonon de bə sısıt iyən bəsosə dəlilon təkyə və peştıpur bıə holədə, şəfoəti məsələ inkor kardedən.
Təkfiri cərəyonon deştə duyə təbliğaton əy bə sıvoli ji bardə mevzuonku qıləyni həm ğəbon ziyorət kardey məsələy.islomi-torıxədə çı umum mısılmınon miyono yolə şəxsiyyəton ğəbon ziyorət kardey qıləy mıstəhəbb iyən bə xoş omə ko tələğği bıə.ım ko iminə kərə ğədəğən kardə kəs,ibn teymiyyə bıə.əv çı peyğombəri(s)-iku hejo çə həzrəti ğəbi ziyorəti həxədə bıə qırd hədisonış zəyif,pesoxtə bıə iyən etımod kardənin nıbə hədisış hisob kardə.səudiyyə ərəbıstoni sabiğ mufti ben baz həm Xıdo ovliya iyən peyğombəri(s)-i ğəbi kəno harcurnə dıvo,istiğasə,ğıboni iyən nəzr kardeyış bənə çı bıt,doon iyən sığon palu kardə bıə dıvo iyən istiğasə mislədə zıneydə və əy şırk hisob kardedə.əv həmçinin de ğəbon ziyorəti niyyəti ıştə kəku hərəkəti bidət bə hisob vardedə.əv ğərəz Xıdo cokəson dıvo,vanq və istiğasə kardey iyən ğəbon ziyorəti rədd kardeyədə,bə Muminun mıborəkə surə 117-ə şərifə ayəistinod kardedə.jqo ki, hamyedə: və mən.....və hakəs de Xıdovəndi vucudi co qılə mə`bud vanqko ki,boəy hiç qıləy dəlilış ni,çən çəy hisob çəy pərvərdıqori nəzdədə bəbe.hukmən Xıdovənd kofiron nicot nibədoe”......
Təkfiri cərəyanon Kərimə-Ğıron təlimon iyən rəvoyətonku peqətə bəştə inhirofə famey əsos,ğəbon ziyorət kardey çı şırki məzhər zıneydən və əvoni təxrib iyən xərob kardey həm vocib hiob kardedən.çı DAİŞ-i sabiğ sərkərdə Əbu Umər Əlbəğdadi 2007-ə milodi sori ım terroristə dastə əğedəon nonzə qılə bəndədə zikr kardedə ki,çəy iminə bəndə çı şırki məzhər və simvol bə hisob omə ğəbon və heykəlon məhf kardeye.joqo ki,həmonə bəndədə jıqo nıvıştey bıə: “əmə jıqo hisob kardedəmon ki,bəpe çı qırd şırki məzhəron məhf və bəpe çəvon həmmə əbzooron hərom bıbu.bə Muslimi çı Əbulhəyyac Əsədiku omə səhihə rəvoyəti əsos,nəğl kardedə ki, Peyğombəre-Əkrəm(s) bə Əli(ə)-i hamyeşe:tıni bə qıləy çi səmt vığandedəm ki,mı boçəy xoto məbus bıəm.bəpe həmmə heykəlon məhfkoş və qırd barzə ğəbon həmo və safkoş”......
DAİŞ terroristə qrup ənbiya və peyğombəron,imomzodəon və səhobəon zərihi de şırki məzhəri vavunə viron kardedən.DAİŞ terroristə dastə çandə qılə peyğombəron ğəbonsə əlovə,çı şiəyon məzhəbi şəxsiyyəton iyən dini ovliyaon ğəbon,həmçinin işğal bıə məntəğonədə mevcud bıə arxeotik və ğədimi əsəron həm de ğarət və taraci məxfi kardey hədəfi,məhf kardeşone.bə Cəbhətun-Nusrə nezətiş terroriston Ədra şəhrədə çı həzrəte Peyğombər(s)-i səhabə bıə Hucr ibn Ədiyyi məğbərə təxrib və xərob kardey bədiqə,çə həzrəti pokə bədəmışon bə qıləy co noməlumə vırə bardəşone.DAİŞ təkfiri və terroristə qrupi coqlə cinoyətonku qıləyni Suriyə şimolədə Riğğə şəhrədə çı Xıdo-Rəsuli(s) əshob Əmmar Yasiri iyən Əmirəl-Muminin Əli(ə)-i bəfodor iyən əziz-qramiyə dustonku bıə Uveys Ğərəni ğəbışon viron və xərobışon karde.çı Siffeyni şəhidon ziyorətqo Rəğğə şəhri cənub-şərbədə və Furati ru sahili i kilo metriyədə ğərolış qətəbe.ım ziyorətqo məcmu de qıləy əzəmətin iyən hevujə memorəti çı Siffeyni canqi seqlə şəhidon yəni çı Əmmar Yasir,Uveys Ğərəni və Ubey ibn Ğeysi məğrbəonku iborət be ki,Hicri-Ğəməri 37-ə sori çı Əli(ə)-i rikabədə de muaviyə ləşkəri mıhoribə zəmonədə bə şəhodət məğami rəsəbin. DAİŞ terroristə qrup həmçinin islomi peyğombər(s) coqlə səhobə Vabisə ibn Məbəd Ələsədi ğəbışon həm təxrib kardə.ım bina çı ğədimə zəmoniku Suriyədə mevcud bıə.de təkfiri vəhhabiyon vositə islomi yolə şəxsiyyəton məzar və ğəbon təxrib kardey fəğət bə DAİŞ iyən Cəbhətun-Nusrə terroristə qrupon məxsus və məhdud bedəni.
