Təkfiri cərəyanon
Təkfiri cərəyanon
Təkfiri cərəyanon
Bə Kərimə-Ğıroni təlimon əsos,bə Peyğombər(s)-i nezə odəmon və Əhli-Beyti(ə) məhəbbət nışon doey bəmə lozım və vocibe.Ğıroni Şura mıborəkə surə 23-ə şərifə ayədə hamyedə:”vuji :mı şıməku bo ın(risoləti xoto) ğərəz çımı nezə odəmon piyesə co qıləy mıkofatım piyedəmni”. Ziyorət ıştən piye və məhəbbət noey nışonəonkuye və beşək,çı Peyğombər(s)-i nezə odəmon piye və bəvon məhəbbət nışon doey məzhəronku qıləyni,çəvon ğəbon ziyorəte.jıləvoni inson,bə Peyğombər(s)-i nezə odəmon və Əhli-Beyti(ə) məhəbbət nışon doydə və ıştəni hozzı kardedə ta bə həmonə yolə şəxson jimoni proqramon əsos ıştə jimoni tənzinko.qıləy inson Peyğombər(s)-i nezə odəmon və Əhli-Beyti(ə)-i ğəbon ziyorətqohədə çə yolə həzrəton fəizləton iyən kəroməton ıştə mığobilədə mıcəssəm vindedə və çı həxpərəstəti,ədolət tələb kardey royədə iyən bə əxloği kəmolaton rəsey prosesədə əvoni boştə ulqu qəteydən.Peyğombəre-Əkrəm(s)-iku nəğl bıə ki,hamyəşe:Zuurul-ğubur.....ğəbon ziyorətkənən ki,axırəti ruji bəşmə yod dənoydə”. Muslim ıştə səhih kitobədə çı Ayişəku nəğl kardedə ki,Peyğombər(s) şəvi oxoyədə bə Bəği ğəbıston şe və bəçəy əhli səlomış vığande”.əhlı-sınnəti fiğhi kitobonədə ziyodə vıronədə ğəbi ziyorət kardey mıstəhəb bıey həxədə hukmon omə.bə Peyğombər(s)-i ku omə çandə qılə hədison əsos,ə həzrət milləti bəştə məzori ziyorət kardey səmt tərğib iyən təşviğ kardedəbe.joqo ki, hamyəşe:”Mən zarəni.....hakəs çımı maqi bədiqə mıni ziyorətko,bənə çımı jimon iyən həyoti devronədə ziyorət kardə kəsiye”.
Təkfiri vəhhabiyon islomi təlimonku səhih nırəsə və bə inhirofi dıço bıə coqlə nəzəonku qıləyni,təvəssuli mənoye.təvəssul luğətədə ikəsi ya qıləy çi vositə ğərol doey mənoədəy.istilohədə təvəssıliku məğsəd iyən mənzur ıme ki,inson ikəs ya qıləy çi Xıdovəndi palu ğərol doydə ta əv bə Xıdo ğurb iyən nezəti vositə bıbu.təvəssuli tərif Kərimə-Ğıronədə iyən dini mənbəonədə,bə Xıdovəndi dərqo iyən nezətiro vositə pəydu kardeye....
Vəhhabi cərəyonon iyən təkfiri dastəon,təvəssul iyən peyğombər(s) iyən məsumə imomon(ə) Xıdovəndi palu vositə ğərol doey,hərom iyən əy çı ırki məzhəronku hisob kardedən.çəvon nəzəku bə ovliya iyən ənbiya təvəssul,qıləy koye ki,şəryətədə torıxış bıəni və bidət hisob kardedən.Muhəmməd bin Əbdul-Vəhab çı təvəssuli həroməti həxədə jıqo nıvıştedə:”əvon ki,bə məlayikə,peyğombəron iyən ilahi ovliyaon təvəssl kardedən və əvoni ıştə şəfii ğərol doydən və deçəy vositə əvoni bə Xıdo dərqo vositə ğərol doydən,çəvon ıştən xun həlol iyən çəvon əmvol mubahe”.səudiyyə ərəbıstoni sabiğ mufti şeyx Əbdul-Əziz ben Baz təvəssuli cayiz zıneydəni və əy bidət və qıləy şırkamizə əməl zıneydə.səudiyyə ərəbıstoni mufti şeyx Əbdul bin Əbdullah Ali-Şeyx votedə ki,təvəssuli həroməti illət və səbəb ıme ki,peyğombər(s)-i de ın aləmi bıə rabitə çəy maqi bədiqə bırniye bedə.əv bo ikəsi dıvo kardey nibəzıne və har qıləy ko əncom doeyədə acize.binobərin,bə acizi təvəssul ağli cəhəto botıle və bə şırki boyis beydə.....
Təkfiri dastə DAİŞ bəştə səhvə nəzə əsos,şiəyon bə peyğombər(s) iyən Xıdo ovliyaon təvəssuli dəlili xoto, çəvon xuni mubah zıneydən.DAİŞ-i sabiğ sıxanəvot Muhəmməd Ələdnani çın barədə jıqo votedə: ”şiəyon bəpe kıştey bıbu.əvon bə Əbbos(ə) iyən Fatimə(s) təvəssul kardedən.əvon mışrikin.bəçəvon kəon daxil bıbənən və çəvon səon çəvon bədəmiku cokənən”.təkfiri vəhhabiyon bə Xıdo təğərrıbi vositə fəğət ilahi əsma və nomon zıneydən və coqlə təvəssıli şırk hisob kardedən.ım qıləy holədəy ki,Kərimə-Ğıron iyən islomi-peyğombər(s)-iku rəsə rəvoyətonədə çı təvəssıli həxədə ziyodə sənədon mevcude.
